VOV4.Bahnar - Khei năr âu ki, tơ̆ d/c Gia Lai, khul linh tơ̆ tơring hlôi jang tơnăp hăm Jơnŭm pơgơ̆r jang tang găn păng tơjră pơrang jĭ COVID-19 dôm jăl jang tơlĕch trong jang tơjră pơrang jĭ. 'Nâu jing minh lơ̆m dôm khul jang tơm, yuk trong hơlâu vă tơjră pơrang jĭ COVID-19 tơ̆ tơring. Rim anih linh hơtŏk hơlen tơ̆ tơring xơlam teh, axong răh tơmam drăm y tê̆, kih thuơ̆t, khul vang jang tang găn păng tơjră pơrang jĭ.

Đơ̆ng tơring hơbuh pơrang jĭ Gò Vấp, plei tơm Hồ Chí Minh vih tơ̆ hnam tơ̆ apŭng Đức Cơ, dêh char Gia Lai, đơ̆ng jê̆ đĭ khei 7 truh dang ei, Hồ Hữu Trung (rơneh xơnăm 1998) đei ‘nhăk tơmơ̆t truh anih pơkăp oei tơklăh minh ƀôt kơ Anih pơgơ̆r Linh dêh char Gia Lai. ‘Nhŏng Trung ăn tơbăt, dôm tơdrong tơchơ̆t tang găn pơrang jĭ tơ̆ âu đei rim bơngai pơm kiơ̆ tơnăp noh xư ƀôh xơđơ̆ng jơhngơ̆m: “Đe khul linh, ƀak sih tơ̆ anih linh jang tôch tơnăp, tơrĕk truh tơdrong erih ‘nhŏng oh. Găh tơdrong pơ ‘nguaih rơgoh, lơ̆m lăm păng tơ̆ ‘nguaih adoi vei xơđơ̆ng, tơdrong xŏng xa rơgoh tơmam drăm xa adoi ‘lơ̆ng. Inh hơlen renh đei 3 ‘măng bơih, adoi pơkăp âm tĭnh. Inh tang măt ăn tôm kon pơlei tơ̆ anih pơkăp oei tơklăh, hmach bơnê kơ đe kang ƀô̆ linh, ƀak sih tơ̆ âu hlôi dăp đon dăp bơnôh tơgŭm ăn kơ nhôn.”

Đơ̆ng blŭng xơnăm truh dang ei, Anih tơm pơgơ̆r linh dêh char Gia Lai hlôi pơkăp oei tơklăh ăn hloh 13.500 ‘nu kon pơlei. Dang ei, tơ̆ 33 anih jang kơ khul linh, tŏk bŏk oei đei hloh 6.700 kon pơlei athei pơm kiơ̆ pơkăp oei tơklăh. Vă tơdrong jang kiơ̆ pơkăp oei tơklăh gơh xơđơ̆ng kơjăp tang găn pơrang jĭ tơpoh dih băl.

Anih tơm pơgơ̆r linh dêh char hlôi pơjao xơnong jang ăn Anih vei tơmam drăm xa, kơtă noh Anih linh jang pơgang hơmet tôm tơmam drăm y tê̆, tơmam kih thuơ̆t, khul linh vang jang tang găn păng tơjră pơrang jĭ. ‘Nguaih kơ noh, anih jang kơdih jang hadoi hăm Khul ƀô̆ đô̆i Vei xơlam teh tơroi tơbăt păng dôm trong tang găn păng tơjră pơrang jĭ, tang găn tơpoh lang xă lơ̆m tơpôl; axong 78 kang ƀô̆ linh jang atŭm hăm dôm anih linh vei xơlam teh chă hơlen vei trong xơlam, tang găn tơdrong mơ̆t lĕch glăi, tơroi tơbăt găh tang găn păng tơjră pơrang jĭ.

Trung tă Lê Hồng Tuấn, Kơdră Anih Linh vei xơlam teh Ia Chía, Ƀô̆ đô̆i vei xơlam teh dêh char Gia Lai ăn tơbăt: Anih linh vei lăng hloh 7km trong xơlam teh, axong 2 khul vei hơlen, rim khul đei 5 - 7 ‘nu, lơ̆m noh đei 4 ‘nu kang ƀô̆ linh đei pơtruh đơ̆ng Anih tơm pơgơ̆r linh dêh char Gia Lai. Kang ƀô̆ linh hơnơ̆ng gak hơlen trong xơlam teh, khŏm mă tang găn dôm bơngai kơdâu mơ̆t glăi găn xơlam teh; tơguăt kơjăp hăm tơring, jang hadoi chă hơlen, ƀôh băt hloh 1.000 ‘nu kon pơlei đơ̆ng dôm tơring nai chôt vih, tơlĕch jang kiơ̆ dôm pơkăp tơroi y tê̆, khăm hơlen băt hơdăh.

Đăi tă Huỳnh Việt Dũng, Phŏ Kơdră Anih pơgơ̆r Linh dêh char Gia Lai ăn tơbăt, Anih tơm pơgơ̆r linh dêh char hlôi pơtruh kơ hrĕng kang ƀô̆ linh, dân kuân tư̆ vê̆ chă xơng, pruih pơgang pơlôch xơmach păng tơmam et xa lơ̆m anih pơkăp oei tơklăh vă vei kơjăp tơdrong tang găn păng tơjră pơrang jĭ: “Dang ei, nhôn jang hadoi hăm dôm anih jang hơmet tôm tơmam drăm kăl, kơjăp đơ̆ng gre axong ăn kŏng ang chơng trong năm truh tơ̆ anih iŏk hơlen pham ƀlep tơchơ̆t đơ̆ng Anih tơm Y tê̆ vă vei xơđơ̆ng ưh đei tơpoh lang xă lơ̆m tơpôl, pơm tơxŭl tơxăl lơ̆m tơring pơkăp oei tơklăh”.

Atŭm hăm Anih tơm Linh Gia Lai, lơ̆m pơđĭ 2 ‘măng hơbuh pơrang jĭ tơ̆ dêh char đơ̆ng blŭng xơnăm truh dang ei, Tiểu đoàn Hoă hŏk (Anih tơm linh tơgŭm jang) păng khul y hŏk yư̆ phŏng (Anih tơm Hâ̆u kân) lơ̆m Quân đoàn 3 (Anih tơm Linh) tơlĕch chă pruih pơgang pơlôch xơmach tơ̆ dôm anih hơbuh pơrang jĭ thĭ xăh Ayun Pa, apŭng Ia Pa, plei tơm Pleiku. Đăi uy\ Phạm Văn Hùng, Kơdră Khul Anih linh D30, Anih tơm Kih thuơ̆t, Quân đoàn 3 ăn tơbăt: Đơ̆ng khei 7 truh dang ei, vă tơgŭm tơring da ƀiơ̆ tơnap tap găh oei tơklăh ƀơ̆t kon pơlei dôm dêh char găh pơbăh chôt vih kơdâu kơ pơrang jĭ, đe kang ƀô̆ linh hlôi axong anih linh oei, akŏm pơkăp oei tơklăh ăn 500 ‘nu kon pơlei: “Nhôn hơmet tôm tơmam drăm, xơng kon pơlei kiơ̆ pơkăp jang kơ tơring. Anih linh đơ̆ng rŏng kơ năm oei ăh anih ‘nao, nhôn tenh kuăng xơđơ̆ng khul grŭp, akŏm anih oei ‘nao, vei xơđơ̆ng tơnăp, keh đang xơnong jang hadoi noh jing tang găn păng tơjră răh pơrang jĭ, keh đang răh dôm tơchơ̆t pơjao juăt jang găh kih thuơ̆t”.

Pơm kiơ̆ tơdrong pơgơ̆r đơ̆ng Quân khu 5, ‘nao âu, Anih tơm pơgơ̆r Linh dêh char Gia Lai hlôi jang hadoi kơtă hơlen 4 anih lơ̆m dêh char vă pơjing hnam pơgang tơdăng vă hơmet ăn bơngai ƀơm jĭ Covid-19. Kiơ̆ kơ noh, anih jang hlôi iŏk Hnam trưng Cao đẳng Gia Lai bơ̆ Hnam pơgang tơdăng vă hơmet ăn bơngai ƀơm jĭ Covid-19 da ƀiơ̆, lơ̆m Anih tơm pơgơ̆r Linh dêh char Gia Lai. Atŭm hăm noh vei xơđơ̆ng tơmam drăm, kơmăi kơmŏk, pơgang hơmet jĭ, hnam pơgang đei khul kang ƀô̆, bơngai jang kang ƀô̆ thây pơgang kơ dôm anih Linh pơm jang tơ̆ dêh char Gia Lai

Hăm tơdrong kơ ‘nôh pơm jang, tôm kơyuơ tơdrong xơđơ̆ng, jơhngơ̆m jăn pran kơ kon pơlei, khul linh Quân khu 5 păng Quân đoàn 3 (Anih tơm Linh) tơ̆ dêh char Gia Lai tŏk bŏk oei đei lơ tơdrong jang tơnăp, tơpă jing minh lơ̆m dôm khul jang dơnơm găh tơdrong jang tơjră pơrang jĭ COVID-19 tơ̆ tơring.

Lan chih păng pơre nơ̆r