VOV4.Bahnar - Pơgê brei, năr 23/6, tơ̆ Hơnĭh bơ̆ jang Khŭl lĭnh vei lăng sơlam tĕh đak Lào, Yŏng lĭnh vei lăng sơlam tĕh đak Lào Chăn-sạ-mỏn Chăn-nha-lạt (Chansamone Chanyalath) hlôi pôk ăn kon jên 200.000 USD ăn Kơdră tang măt Việt Nam tơ̆ Lào Nguyễn Bá Hùng, tơgŭm Khŭl kơdră tĕh đak păng kon pơlei Việt Nam tang găn jĭ Covid-19. Hăm jơhngơ̆m đon vang chă tơgŭm dĭh băl lơ̆m tơnap tap, Khŭl lĭnh vei lăng sơđơ̆ng tĕh đak Lào hlôi chă hơvơn kang ƀô̆, khŭl lĭnh vang chă tơgop tơgŭm tŏ sĕt kon jên tơgŭm djru khŭl kơdră tĕh đak păng kon pơlei Việt Nam đei dơ̆ng kon jên tang găn jĭ Covid-19. Kơdră tang măt Nguyễn Bá Hùng jei tơroi tơbăt ăn Kơ iĕng Thủ tướng, Yŏng khŭl lĭnh vei lăng sơlam tĕh đak Lào Chansamone Chanyalath găh tơdrong jang tang găn jĭ Covid-19 tơ̆ Việt Nam, mă kăl rim tơring tŏk bŏk đei jĭ hơbŭh pơrăm kơtang. Adoi sơkơ̆t hơdăh, Đảng, Tĕh đak păng kon pơlei Việt Nam gô hơnơ̆ng iung yak hơdoi, tơgŭm djru Lào iung tơ jră tang găn jĭ hơbŭh Covid-19.

Tơblơ̆ nơ̆r: Amazưt