VOV4.Bahnar - Tơ̆ hơ năp dôm tơ drong krê hơ mơt đơ̆ng jĭ Covid -19 ƀât mă tĕh đak Campuchia oei đei bơ ngai tơ pŏh jĭ Covid -19 tŏk tôch lơ, dêh char Mondulkiri, tơ ring sơ lam hăm 2 apŭng Ea Súp păng Buôn Đôn kơ dêh char Dak Lak hlôi đei bơ ngai jĭ Covid -19 ‘năi  bơih. Hăm đon kơ chăng ưh ăn jĭ tơ pŏh truh tơ̆ bơ̆n, dôm kơ đông linh vei lăng tơ ring sơ lam dêh char Dak Lak vei kơ jăp dôm anih gak păng kơ sô̆ bơ ngai jang năm dăr joang, gak tơ̆ trong sơ lam. Atŭm hăm ‘nŏh, hơ tŏk  khul linh, tơ mam vă bơ̆ jang tơ̆ dôm tơ ring kăl, krê hơ mơt, tơ tom chă ƀôh, găn lê̆ lu bơ ngai chă mât lơ̆m tĕh đak glăi luơ̆t.

Jĭ bơ ngai vang năm chă hơ len jĭ tơ pŏh păng tang găn tơ tom 12 ‘nu bơ ngai đơ̆ng Campuchia vă kơ dâu mât glăi luơ̆t tơ̆ apŭng Ea Súp gơ măng 25/4 âu ki, Trung úy Cao Tiến Dũng, oei bơ̆ jang tơ̆ anih gak tang găn jĭ Covid -19 đơ̆ng kơ đông linh Ia Rvê tơ roi:

“Kiơ̆ đơ̆ng răp gak, bbôh nhen đei bơ ngai vă mât glăi luơ̆t ‘nŏh druh ‘moi mưh ƀôh đe mât hlom păih tĕh đak bơ̆n, nhôn roi tơ băt păng jang hơ doi hăm dôm khul linh tơ̆ xăh găn păng ăn oei hơ drô̆ tôch tơ tom. Tơ dăh tơ ring sơ lam ưh đei vei lăng ‘lơ̆ng ‘nŏh lơ̆m tĕh đak gô pŭ lơ tơ drong răm kơ nê̆ kơ na nhôn athei hơ tŏk đon kơ chăng, hơ tŏk đon jang mă tơ năp hlŏh dơ̆ng, tang găn jĭ nhen thoi tang găn hơ yăt.”

Anih gak tơ̆ kơ đông Ia Rvê

Kiơ̆ Đại úy Hoàng Văn Tuân, Phŏ Kơ dră chĕp kơ̆l kơ đông linh Ia Rvê, đơ̆ng ‘năr 25/4 truh dang ei, tơ̆ dôm trong sơ lam kơ apŭng Ea Súp, ƀô đô̆i vei lăng tơ ring sơ lam jang hơ doi hăm dôm khul grŭp tơ tom chă ƀôh păng găn đei 3 khul hăm 17 ‘nu bơ ngai mât lơ̆m tĕh đak glăi luơ̆t. Băt hơ dăh tơ̆ hơ năp kơnh, tơ drong ‘nâu oei đei hơ nơ̆ng, kơ na kơ đông pơ lung ‘nhŏng ŏh adrin yak hlŏh dôm tơ drong mơ mat tat tơ̆ tơ ring tĕh ưh ‘lơ̆ng, tŏ ‘mi kial kơ nê̆ vă jang ‘lơ̆ng tơ drong jang kơ dih, khŏm vei lăng sơ đơ̆ng ‘lơ̆ng tơ̆ tơ ring sơ lam:

“Khul linh đơ̆ng kơ đông ưh đei lơ, oei bơ ngai đơ̆ng nai chă trong mât glăi tơ̆ tơ ring kơ plăh jơ pơ dơ̆h jang ‘nŏh tôch lơ, tŏ ‘mi kial kŭm nhen tơ ring tĕh ưh kơ ‘lơ̆ng, lơ̆m pơ yan phang tĕh hrĕng kơ na đe chă mât kiơ̆ trong nai, ưh đei ‘moi kiơ̆ 1 pôm trong. Tơ̆ hơ năp tơ drong mơ mat tat ‘nŏh, Khul kơ dră chĕp kơ̆l kơ đông pơ jao hơ dăh tơ drong jang trư̆k gak tơ̆ tơ ring sơ lam, athei pơ lơ̆h băl gak kiơ̆ khul grŭp tơ̆ tơ ring sơ lam vă vei lăng ‘lơ̆ng hlŏh.”

Oei tơ̆ anih gak tang găn jĭ Covid -19 đơ̆ng kơ đông linh vei lăng ‘măng jang sơ lam Đắk Ruê ‘nŏh, tơ drong jang dăr joang, vei lăng kŭm đei kơ đông bơ̆ jang tôch ai, Trung tá Phùng Văn Bình, kăn ƀô̆ quân y Kơ đông linh Đắk Ruê ăn tơ băt:

“’Nhŏng ŏh tơ̆ âu dăr joang tơ̆ tơ ring sơ lam vă tang găn tơ drong jĭ. Tơ dăh đei bơ ngai kơ dâu mât glăi luơ̆t tơ̆ tơ ring sơ lam ‘nŏh ‘nhŏng ŏh tang găn, ăn oei hơ drô̆ tơ̆ kơ đông. ‘Nhŏng ŏh gak tơ̆ âu păng ‘nhŏng ŏh lơ̆m kơ đông đei jơ hngâm đon tang găn jĭ tôch ai, ưh ăn jĭ tơ pŏh mât tơ̆ tơ ring sơ lam.”

Linh vei lăng tơ ring sơ lam gak tơ̆ anih gak tang găn jĭ Covid -19 ‘Măng jang sơ lam Đắk Ruê

Thượng tá Nguyễn Minh Tuyên, Phŏ Kơ dră chĕp ƀô đô̆i vei lăng tơ ring sơ lam dêh char Dak Lak, ăn tơ băt: Tơ̆ tơ ring sơ lam trong kơ jung hlŏh 73km sơ lam hăm dêh char Mondulkiri, tĕh đak Campuchia, dôm kơ đông linh vei lăng tơ ring sơ lam hơ tŏk tơ drong dăr joang, vei lăng, khŏm tang găn ưh ăn bơ ngai mât lĕch glăi luơ̆t. Kŭm hăm ‘nŏh, dôm kơ đông jang hơ doi kơ jăp hăm anih jang đảng, khul kơ dră tơ ring, mă loi tơ̆ 4 xăh sơ lam găh dôm apŭng Ea Súp păng Buôn Đôn, hơ tŏk tơ drong tơ roi tơ băt, hơ tŏk đon hlôh vao, trong jang tang găn jĭ Covid -19 ăn kon pơ lei:

“Kơ đông pơ jing 6 anih gak, 18 grŭp dăr joang, akŏm tơ mam drăm, pơ lung kăn ƀô̆, linh vei lăng gak prăt măng, prăt năr tơ̆ tơ ring sơ lam, vei kơ jăp ưh ăn bơ ngai mât glăi đơ̆ng Campuchia mưh ưh đei khăm hơ len jĭ.”

Yak hlŏh mơ mat tat, gleh hrat tơ̆ tơ ring sơ lam, rim kăn ƀô̆, linh vei lăng tơ ring sơ lam dêh char Dak Lak adoi đei đon adrin tang găn jĭ Covid-19, ưh ăn jĭ tơ pŏh mât lơ̆m tơ ring.

            Nam Trang: Chih

Dơ̆ng: Tơ blơ̆