VOV4.Bahnar - Tơ̆ anih jrăng sơ lam 790, ‘măng jang sơ lam Bờ Y, apŭng Ngọc Hồi, Anih chĕp kơ̆l pơ gơ̆r khul linh vei lăng tơ ring sơ lam dêh char Kon Tum pơ gơ̆r hơ păh tơ mam xa, pơ gang ăn Công an, khul linh 2 dêh char Attapư păng Sê Kông, tĕh đak CHDCND Lào.

Anih chĕp kơ̆l pơ gơ̆r Ƀô đô̆i vei lăng tơ ring sơ lam Kon Tum hơ păh tơ mam xa, pơ gang ăn Công an, khul linh 2 dêh char Attapư păng Sê Kông

Akŏm đĭ đăng Anih chĕp kơ̆l pơ gơ̆r Ƀô đô̆i vei lăng tơ ring sơ lam dêh char Kon Tum hơ păh ăn 2 dêh char 13 tân phe, 80 kơ thŭng mi tôm kŭm hăm che gom, hơ băn ao hrŭk vei lăng hơ kâu jăn, đak pơ gang pơ lôch pơ rang jĭ, akŏm đĭ đăng đei kơ jă hlŏh 220 triu hlak jên.

Bơ ngai dơ̆ng tang ăn khul linh Công an, khul linh tĕh đak kơ 2 dêh char Attapư păng Sê Kông bơ nê tơ drong tơ gŭm tôch đei yoa, tơ tom đơ̆ng Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam Kon Tum; atŭm hăm ‘nŏh hơ nơ̆ng năng kăl, vei kơ jăp tơ drong pơ vei ‘lơ̆ng hơ iă, kăp gĭt, hơ tŏk tơ drong jang hơ doi roi kơ jăp mưh bơ̆ jang vei lăng sơ đơ̆ng tơ̆ tơ ring sơ lam păng tang găn tơ drong yoch ma túy.

Dơ̆ng: Tơ blơ̆