VOV4.Bahnar – Lơ̆m 6 khei blŭng xơnăm, khul mơlôh Đăk Lăk hlôi pơm jang 13 rơbâu tơdrong jang đơ̆ng đe hơdruh tơdăm, tơgop jơhngơ̆m pơjing tơring pơxĕl 'nao, tơgŭm dôm tơring tơnap tap lơ̆m dêh char.

Hơdăh, lơ̆m 6 khei kơ âu, jâ̆p dêh char hlôi pơtơm 'nao păng vei lăng jê̆ 41 rơbâu tơm 'long jơk, pơjing đei 47 anih akŏm pơchơt ăn đe hơdruh tơdăm đe hơ ioh tơ̆ dôm xăh, phương, thĭ trâ̆n. Tơlĕch jê̆ 200 tơdrong jang tơgŭm đe hơ ioh păng tơgŭm hloh 37 rơbâu đe hơ ioh đei tơdrong erih tơnap tap. Pơjing 5 tơdrong jang tơgŭm ăn hơdruh tơdăm hăm 53 tơdrong iung pơm jang đơ̆ng đe hơdruh tơdăm păng tơgŭm tŏk iŏk jên jê̆ 48 tih hlj ăn hơdruh tơdăm hơtŏk mŭk drăm. Kiơ̆ xơkơ̆t đơ̆ng Anih jang Đoan dêh char Đăk Lăk, lơ̆m 6 khei kơ âu, mă ƀơm răm đơ̆ng pơrang jĭ Covid-19 pơm ăn dôm tơdrong jang jing tơnap tap, lơ tơdrong jang athei pơdơh dăh mă lê̆ hloi. mă lei dôm tơdrong jang duh oei đei tơlĕch hrơ̆p minh 'măng, lơ anih jang đoan tơ̆ tơring hlôi đei trong jang hơbĕch lơ̆m tơdrong pơkăp pơm jang, vei xơđơ̆ng keh đang xơnong jang, atŭm hăm noh hơbĕch lơ̆m tơdrong jang hadoi hăm khul jang nai vă tang găn păng tơjră pơrang jĭ.  

Lan chih păng pơre nơ̆r