VOV4.Bahnar - “Hơ nơ̆ng hơ tŏk dôm tơ drong đei yoa găh trong tang găn jĭ COVID-19, hơ dai hăm jang tơ iung ming dơ̆ng păng atŏk tơ iung mŭk drăm tơ pôl tơ̆ tơ ring; đei trong jang ‘lơ̆ng hlŏh dơ̆ng vă vei sơ đơ̆ng kơ jă tơ mam tơ̆ anih tĕch mơ dro păng tơ gŭm hơ met pơ ‘lơ̆ng dôm tơ drong mơ mat tat ăn tơ drong jang xa, tĕch mơ dro ăn anih tĕch mơ dro păng kon pơ lei… ‘nŏh jĭ dôm tơ drong tơm đei bơ ngai tăh hla dêh char Dak Lak pơ ma lơ̆m jơ tơ ƀâp bơ ngai tăh hla đơ̆ng rŏng Hop akŏm mă 2, Kuô̆k hô̆i jăl XV hăm Khul tang măt Kuô̆k hô̆i dêh char Dak Lak ‘năr brei (18/11).

Khul tang măt Kuô̆k hô̆i dêh char Dak Lak tơ ƀâp bơ ngai tăh hla

Yoa tơ drong jĭ COVID-19 oei tôch hơ mơt, Hop akŏm tơ ƀâp bơ ngai tăh hla tơ̆ Dak Lak đei pơ gơ̆r kiơ̆ trong trư̆k tuyê̆n đơ̆ng anih pơih pơ dăh tơ̆ Jơ nŭm pơ gơ̆r kon pơ lei dêh char truh hăm dôm tơ ring. Tơ̆ hop akŏm, lơ bơ ngai tăh hla tơ rĕk păng pơ ma tơ lĕch lơ tơ drong ƀơm truh tơ drong hơ tŏk tơ drong đei yoa đơ̆ng dôm trong tang găn jĭ COVID-19, hơ dai hăm tơ iung ming dơ̆ng păng atŏk tơ iung mŭk drăm tơ pôl tơ̆ tơ ring; tơ lĕch trong jang mă ‘lơ̆ng ƀiơ̆ vă vei sơ đơ̆ng kơ jă tơ mam tơ̆ anih tĕch mơ dro păng tơ gŭm hơ met pơ ‘lơ̆ng mơ mat tat hăm tơ drong jang xa, tĕch mơ dro ăn kon pơ lei păng anih tĕch mơ dro tơ̆ hơ năp tơ drong ƀơm kơ nê̆ đơ̆ng jĭ COVID-19.

Dơ̆ng: Tơ blơ̆