VOV4.Bahnar - ‘Năr 7/10, tơ̆ anih pơih pơ dăh plt Đà Lạt, Khul tang măt Kuô̆k hô̆i dêh char Lâm Đồng pơ gơ̆r tơ ƀâp bơ ngai tăh hla găh Grŭp dôm anih jang, khul jang Đảng, khul kơ dră pơ gơ̆r, MTTQ Việt Nam dêh char păng dôm apŭng Lạc Dương, Đơn Dương, Đức Trọng kiơ̆ trong trư̆k tuyê̆n. Tơ̆ jơ tơ ƀâp, dôm bơ ngai tang măt Kuô̆k hô̆i tơ roi ăn bơ ngai tăh hla Lâm Đồng găh dôm tơ drong gĭt kăl đơ̆ng hop akŏm mă 2, Kuô̆k hô̆i jăl XV vă pơ gơ̆r đơ̆ng ‘năr 20/10 truh ‘năr 13/11 kơnh; roi tơ băt tơ drong jang mŭk drăm, tơ pôl tơ̆ tơ ring păng lơ̆m tĕh đak 9 khei blŭng sơ năm păng trong vă jang lơ̆m 3 khei hơ tuch sơ năm 2021. 

Ƀok Trần Đình Văn, Phó Bí thư đảng dêh char, Kơ dră chĕp kơ̆l Khul tang măt Kuô̆k hô̆i dêh char Lâm Đồng chĕp răk nơ̆r pơ ma đơ̆ng bơ ngai tăh hla

Kŭm tơ ƀôh đon lui, tơ drong tơ rĕk đơ̆ng Đảng, tĕh đak lơ̆m tơ drong jang atŏk tơ iung mŭk drăm, tơ pôl, tang găn jĭ Covid-19, bơ ngai tăh hla dêh char Lâm Đồng pơ ma truh lơ tơ drong kăl đei sek tơ lang păng hơ met ming. ‘Nŏh jĭ tơ drong vei lăng bri tam mă kơ jăp, tơ mam chŏh jang xa tĕch mơ mat tat, choh jang xa hăm mơr vă pơm hơ tŏk kơ jă tơ mam tam mă pran ‘lơ̆ng, tơ drong asong đe tŏk iŏk jên hăm jên kon tôch lơ oei đei tơ̆ tơ ring tơ rang, tơ drong krê hơ mơt jĭ Covid-19 tơ pŏh tơ̆ dôm kơ chơ mong akŏm tơ mam păng bơ ngai huơ̆r gre chơ tơ mam kơ dâu trong hơ tăih...

Dơ̆ng: Tơ blơ̆