VOV4.Bahnar - Bri tơ̆ Groi bri vei rong Ea Sô, apŭng Ea Kar, dêh char Dak Lăk păng Phú Yên tŏk bŏk bơbĭt iŏk tôch kơtang. Pơlơ̆m lơ̆m khei ‘năr đei jĭ hơbŭh Covid-19 tŏk bŏk pơrăm kơtang, rim năr mơjĭt khŭl tơtông ‘long yak đơ̆ng dêh char Gia Lai mơ̆t lơ̆m bri Ea Sô. Dôm bơngai tơtông au mĭnh păh chă kŏh ‘long, mĭnh păh chă hơngoang, kŏh pơrăm ‘long bri păng pơlôch sem bri gĭt kăl hloi. Đe hăp tôch kơchu, chă yak lơ bơngai, đei hloi bơ̆n phao, tơdăh khŭl vei lăng bri ƀô̆h ‘nŏh đe hăp tơdrŭt hloi, đei ‘măng đe hăp năm dŏng bơngai mă khŭl vei lăng bri rôp gơ̆t păng tơtông iŏk tơmam drăm. Dôm bri kơdrơ̆ng ‘nŏh jing bri mă mĭm pă tŏ set sot oei đei tơ̆ Tây Nguyên oei tŏk bŏk vă răm kơtang.

Khŭl tơtông rơ ông rơ ang vang mơ̆t lơ̆  bri Ea Sô.

Mĭnh năr hơtuch khei 8, kơtơ̆ng ang khul tơtông ‘long rơ ông mơ̆t lơ̆m bri vei rong Ea Sô, găh groi bri 616, tơring hơlam hăm dêh char Gia Lai, Kơdră chĕp pơgơ̆r Hơnĭh vei rong bri Ea Sô hlôi iung năm yak hlŏh 90km trong nơnăm mơ̆t lơ̆m bri chă răp. Dang 6 jơ kơsơ̆, kơtơ̆ng ang tơbăt khŭl kŏh tơtông ‘long tŏk bŏk lĕch đơ̆ng bri, 5 ‘nu kang ƀô̆ hlôi tang găn păng ƀô̆h hlŏh mơjĭt ‘nu bơngai tŏk bŏk chơ ‘long. Lăp ƀơ̆t dŏh khul tơtông au kơdau sơlăh sơlang mơ̆t lơ̆m bri, lăp rôp đei 1 ‘nu bơngai.

         Lăp rôp đei 1 ‘nu bơngai atŭm hăm 6 tong gre đô̆, 2 tŏ kmăi ot ‘long, 1 tong phao đô̆ păng hlŏh 1 tă ‘long krăk, khŭl kơdră chĕp pơgơ̆r Hơnĭh vei lăng bri rong Ea Sô hlôi krao điên thoăi ăn Dơnŏ anĭh vei lăng bri apŭng Krông Pa, dêh char Gia Lai vang chă tơgŭm, xek tơlang. Dang 3 jơ đơ̆ng rŏng ‘nŏh, ‘nŏh jing 9 jơ gơmăng, khŭl bơ̆ jang kơ Dơnŏ anĭh vei lăng bri apŭng Krông Pa lăp dang pă 50km trong nơnăm mă trŭh tơ̆ hơnĭh, rôp ba bơngai kŏh ‘long tơtông atŭm hăm bơ̆n gre păng kmăi ot ‘long vĭh tơ̆ apŭng Krông Pa vă xek tơlang. 

Dôm bơngai tơtông đei rôp lơ̆m tŏk bŏk kŏh ot ‘long lơ̆m bri

Lăp năr đơ̆ng rŏng, hơnĭh gak vei lăng bri 616 ƀô̆h dơ̆ng mĭnh khul kŏh tơtông ‘long anai chơ tôch kơ lơ ‘long bri gĭt kăl đơ̆ng bri vei rong brŏk vĭh tơ̆ Gia Lai. Lăng ƀô̆h kang bô̆ vei lăng bri rong, khŭl tơtông hăm hlŏh 10 tong gre đô̆, dang 15 ‘nu bơngai hlôi kơdau klĕnh. Dang 10 pơnĭt drŭh rôp, kang ƀô̆ vei lăng bri vei rong hlôi rôp đei 1 ‘nu bơngai chơ ‘long Tơnhum. Lơ̆m mă au, đe hăp hlôi kơdau yak trŭh tơ̆ groi tĕh kơ dêh char Gia Lai, pă đei lơ̆m tơring kơ Hơnĭh vei rong bri bơih. Bơngai tơtông pơjăh tôch kơtang, tơ jră plơ̆ păng krao điên thoăi ăn đe boăl sư vang dŏng. Lăp tim mă trŭh 30 pơnĭt, kơ mơjĭt ‘nu bơngai chĕp ba bơ̆n đao, tơgăk năm trŭh. ‘Nhŏng Trần Văn Khánh, bơngai bơ̆ jang hơ Hơnĭh gak vei lăng bri kơsô̆ 2, kơ Hơnĭh vei rong bri Ea Sô, đei ăn vang năm bơ̆ jang tơ̆ hơnĭh gak vei lăng bri 616, hơlam hăm dêh char Gia Lai tơroi tơbăt, hlôi đei lơ ‘măng lơ lau, khŭl tơtông ‘long bri năm dŏng tơgŭm khŭl đe hăp păng tơtông iŏk dơ̆ng dôm ‘long mă hơnĭh au rôp gơ̆t.“Hơnăp jang kơ Vei rong bri ‘long ‘nŏh lăp gơ̆h oei lơ̆m groi bri bơ̆n vei lăng đĕch, kơna tơnap mă rôp gơ̆t khŭl tơtông. Mă kăl ‘nŏh khŭl tơtông akhan khŭl jang vei rong bri ư̆h kơ gơ̆h rôp tơ̆ lơ̆m groi tĕh kơ dêh char Gia Lai, mơmat dêh. Đe hăp tôch kơ chu, tơ jră plơ̆ vă tơtông iŏk dơ̆ng tơmam drăm đe hăp, ‘long, gre đe hăp.”

         Ƀok Bàn Tiên Thái, Kơ iĕng Kơdră chĕp pơgơ̆r Hơnĭh vei lăng bri kơsô̆ 3 găh Hơnĭh vei rong bri Ea Sô, đei ăn vang bơ̆ jang vei lăng bri 616, jei tơroi tơbăt, khŭl tơtông tơ̆ tơring hơlam, mă kăl găh dêh char Gia Lai, roi năr roi kơchu. Hlôi đei lơ ‘măng đe hăp drŭh tĕh, đei ‘măng đe hăp oei vă pơlôch khŭl vei lăng bri dơ̆ng, vă ‘nhŏng ŏh vei lăng bri hli kơ đe hăp:“Tơ̆ Hơnĭh vei rong bri au hlôi đei 2 ‘nu răm khŭl tơtông ‘long prăh păng 3 ‘nu bơngai răm đe hăp ƀet. Nhen ‘nhŏng Cao, tơ̆ kơ ‘năr drŭh rôp khŭl tơtông kŏh ot ‘long, lăp trŭh tơ̆ gơmăng khŭl tơtông năm prăh tơ̆ hơnĭh gak. Mă ƀar ‘nŏh ‘nhŏng Hoàng, tơ̆ gơmăng rôp khŭl tơtông ‘long lơ̆m bri, răm hê̆ khŭl tơtông bri ƀet hlô̆h tơsŏh. Găh ‘nhŏng Tùng, jei năm tơ̆ au bơ̆ jang tơ̆ hơnĭh ‘nau, rôp gơ̆t ‘long tơ̆ trong sơlăh mă iĕm năm brei ‘nŏh, trŭh gơmăng dang 100 ‘nu bơngai dui dĭh băl năm tĕh ‘nhŏng Tùng, pham lĕch ƀrông ƀrang, vă jê̆ lôch hloi. Tơdăh gơmăng ‘nŏh ư̆h kơ tom năm ming hơmet lei rŏ năng ‘nhŏng Tùng pă erĭh bơih rŏ năng.”

Gre bơbĭt đô̆ chơ tơtông ‘long krăk

Ƀok Lê Minh Tiến, Kơdră chĕp pơgơ̆r Hơnĭh vei rong bri Ea Sô tơbăt, pơlơ̆m lơ̆m khei ‘năr đei jĭ hơbŭh Covid-19 pơrăm kơtang, khŭl tơtông dui dĭh băl năm mơ̆t lơ̆m bri kơ drơ̆ng mă hơnĭh au vei lăng. Đe hăp tŏk bŏk pơrăm hŭt dôm tơdrong yă kiơ gĭt kăl hlŏh kơ bri kơdrơ̆ng Ea Sô nhen ‘long krăk, ‘long kơnhu, ‘long tơnơ̆ng păng pơ đĭ xem bri brăh hloi. Tơdrong mă au jĭ tôch tơtăm mư̆h bơ̆ jang vei lăng bri, vei lăng bri brăh kơ Hơnĭh vei rong bri tŏk bŏk tơ ƀơ̆p tôch lơ tơdrong tơnap tap kơ yuơ khŭl jang kơ toei, ư̆h kơ đei lơ tơmam drăm bơ̆ jang păng ư̆h gan tơmơ̆t jên jang dơ̆ng. Hơnĭh vei rong bri đei vă jê̆ 6.000ha tơter hăm ƀar dêh char Gia Lai păng Phú Yên. Dang ei tơdrong vei lăng năng tông bri tơring sơlam măh yak trong ver, yak hlŏh groi tĕh kơ dêh char Gia Lai păng Phú Yên. Rôp đei khŭl tơtông tơ̆ groi tĕh hơlam ‘nŏh nhen lĕ ư̆h kơ gơ̆h vă rôp chơ ba đe hăp năm tơ̆ groi tĕh kơ Dak Lăk vă xek tơlang ôh. Kiơ̆ đơ̆ng ƀok Lê Minh Tiến, đei ƀar tơdrong tơm kăl đei tơdrong lăng ba, chĕp pơgơ̆r đơ̆ng dêh char Dak Lăk adoi nhen ƀar dêh char Gia Lai păng Phú Yên ‘nŏh:“Jei hơpơi rim hơnĭh bơ̆ jang găh au kơ dêh char boăl atŏk kơtang bơ̆ jang pơtrui, adoi nhen gak vei lăng vă khŭl tơtông ư̆h kơ gơ̆h mơ̆t lơ̆m bri. Tơdăh mơ̆t klĕnh lei jei ư̆h kơ gơ̆h vă chơ dôm tơmam drăm lĕch đơ̆ng bri ôh. Mă ƀar, tơdrong kăl hlŏh ‘nŏh kăl tơmơ̆t jên jang tơ iung pơjing, ming hơmet dơ̆ng jăl trong đơ̆ng Anĭh vei lăng bri kơsô̆ 5 trŭh tơ̆ Hơnĭh vei lăng bri kơsô̆ 9 vă nhôn yông hơnĭh gak đơ̆ng groi tĕh dêh char Gia Lai vĭh. Ăp lơ lŏh tơdăh rôp đei khŭl tơtông ‘nŏh gơ̆h rôp ba năm tơ̆ Hơnĭh vei rong bri adoi nhen xek tơlang kơhret. Tơdăh nhen dang ei pơm hơnĭh gak tơ̆ groi tĕh kơ dêh char Gia Lai, mư̆h rôp đei khŭl tơtông nhôn chơ đe hăp yak hlŏh pơlei pơla đe hăp lei tôch mơmat tat.”

         Pơlơ̆m lơ̆m khei ‘năr jĭ hơbŭh kơtang păng pơlơ̆m lơ̆m dôm tơdrong tơnap tap kơ khŭl vei lăng bri mư̆h ư̆h kơ măh khul bơ̆ jang, ư̆h gan đei phao kơtoang păng ư̆h kơ gan đei tơdrong vang jang hơdoi dĭh băl kơ rim dêh char, rim khŭl tơtông ‘long tơ̆ tơring hơlam hăm dêh char Gia Lai păng Phú Yên tŏk bŏk rơ ông rơ ang vang năm mơ̆t phă pơrăm bri vei rong Ea Sô, phă pơrăm ‘long bri gĭt kăl păng xem bri brăh. Bri kơdrơ̆ng păng bri brăh gĭt kăl ăn groi kông păng tơring tơmăn, hơnĭh oei sa kơ mĭm hui kơ đei tơ̆ Tây Nguyên tŏk bŏk vă răm kơtang. Tơdrong mă au, kăl đei tơdrong vă iung jang pơ đĭ 3 dêh char ‘nŏh Dak Lăk, Gia Lai păng Phú Yên vă vei lăng hroong bri vei lăng Ea Sô.

Bai chĭh đơ̆ng: VOV Tây Nguyên

Tơblơ̆ nơ̆r: Amazưt