VOV4.Bahnar - Kơ sơ̆ 16/11, tơ̆ Hà Nội, pơ gơ̆r hop akŏm pơ tôch tơ drong jang hơ doi đơ̆ng Anih krao hơ vơn kon pơ lei Trung ương hăm Khul kơ dră chĕp kơ̆l đảng Anih vei lăng hơ drĕch kon kông đơ̆ng 2016-2020 păng kĭ pơ kăp tơ drong jang hơ doi đơ̆ng 2021-2025. Bí thư Trung ương Đảng, Kơ dră chĕp kơ̆l Anih krao hơ vơn kon pơ lei Trung ương Bùi Thị Minh Hoài păng ƀok Kơ dră chĕp kơ̆l Anih vei lăng hơ drĕch kon kông Hầu A Lềnh vang pơ gơ̆r hop akŏm.

Tơ̆ hop akŏm, 2 anih jang drơ̆ng nơ̆r ăn tơ drong jang hơ doi đơ̆ng 2021-2025 hăm lơ tơ drong gĭt kăl nhen: Tơ chĕng hơ len, roi tơ ƀôh ăn Anih tơm Chinh trĭ, Ban Bí thư găh dôm trong jang, tơ drong tơ gŭm ƀơm truh tơ drong jang kon kông, tơ drong jang krao hơ vơn kon pơ lei kon kông lơ̆m chăl ‘nao; Vang chih tơ ƀôh đon tơ chĕng, trong jang đơ̆ng Đảng găh krao hơ vơn kon pơ lei kon kông kiơ̆ tơ drong Tơ chơ̆t đơ̆ng Hop akŏm mă 13 kơ Đảng.

Dơ̆ng: Tơ blơ̆