VOV4.Bahnar - Chiều 27/8, Bí thư Trung ương Đảng, Kơdră chĕp pơgơ̆r Trung ương MTTQ Việt Nam Đỗ Văn Chiến hlôi sơng iŏk tơgŭm djru jên 1 ti hlak jên đơ̆ng Kŏng ty Atŏk tơ iung Nam Bình Xuyên Green Park tơgŭm ăn Tơdrong pơgơ̆r “Kơtriu tơnô̆ tơmam drăm Tơgoăt tơgoăl vang tơgŭm ăn kon pơlei tơring Pơbăh yak hlŏh jĭ hơbŭh Covid-19”. Trŭh dang ei, Dơnŏ anĭh  Trung ương MTTQ Việt Nam hlôi klăh asong kon jên 117 ti hlak jên tơgŭm ăn pơlei tơm pơlei tơm Hồ Chí Minh păng rim dêh char găh Pơbăh kiơ̆ Tơdrong jang krao hơvơn au. Kơdră chĕp pơgơ̆r Trung ương MTTQ Việt Nam Đỗ Văn Chiến pơma hơdăh, gô pơtrŭh tơtom kon jên tơgŭm djru au trŭh hăm tơpang ti kon pơlei vă kon pơlei đei jơhngơ̆m yak hlŏh dôm khei ‘năr tơnap tap tang găn jĭ hơbŭh Covid 19. Ƀok Đỗ Văn Chiến hơpơi lơ̆m khei năr kơnh đei dơ̆ng jơhngơ̆m đon ‘lơ̆ng hơ iă vang yak hơdoi hăm Mặt trận tơgŭm djru kon pơlei yak hlŏh tơnap tap kơ tŏ ‘mi kial păng jĭ jăn pơrăm.

Tơblơ̆ nơ̆r: Amazưt