VOV4.Bahnar - Anih tang găn pơ rang jĭ Trung ương ‘nao tơ chơ̆t klăih song 8 triu kơ liêu vaccine Vero Cell đơ̆ng công ty Sinopham Trung Quốc ăn 25 dêh char, plt lơ̆m tĕh đak. ‘Nâu jĭ ‘măng klăih song vaccine mă 43 đơ̆ng Anih tơm vei lăng jang pơ gang.

Hà Nội jĭ tơ ring đei klăih song lơ hlŏh hăm 1.359 triu kơ liêu, lơ̆m kơ sô̆ 8 triu kơ liêu vaccine Vero Cell, dơ̆ng mă 2 ‘nŏh jĭ Quảng Ninh hăm hlŏh 700.000 kơ liêu. Lạng Sơn, Hải Phòng, Yên Bái păng plt Hồ Chí Minh, 1 dêh char, plt đei klăih song 500.000 kơ liêu. Bắc Ninh 400.000 kơ liêu; Khánh Hòa, Kiên Giang 1 dêh char 300.000 kơ liêu; dôm dêh char Bắc Giang, Nam Định, Thanh Hóa, Nghệ An, Quảng Trị, Bình Định, Long An, Đồng Tháp, Lâm Đồng, Tây Ninh...đei klăih song 1 dêh char 200.000 kơ liêu.

Anih tang găn pơ rang jĭ Trung ương athei Anih pơ gơ̆r ƀet bơ̆ng jĭ kơ tĕh đak jang hơ doi vă chơ pơ truh vaccine ăn Anih ƀet bơ̆ng pơih xă kiơ̆ tơ ring. Anih vei lăng tơ drong jĭ jăn dôm dêh char, plt pơ gơ̆r ƀet hloi kơ sô̆ vaccine Vero Cell COVID-19 đei klăih song, ƀet jrŭm 1 păng jrŭm 2.

Dơ̆ng: Tơ blơ̆