VOV4.Bahnar - Lơ̆m lơ sơ năm âu ki, Kơ đông linh vei lăng tơ ring sơ lam Hồ Le (Ƀô đô̆i vei lăng tơ ring sơ lam dêh char Kon Tum) hơ tŏk tơ drong krao hơ vơn kon pơ lei, pơm kiơ̆ ‘lơ̆ng trong jang đơ̆ng Đảng, khôi luơ̆t tĕh đak, vang tơ gop vei lăng kơ jăp ‘lơ̆ng tơ drong sơ đơ̆ng chinh trĭ, sơ đơ̆ng lơ̆m tơ pôl tơ̆ tơ ring sơ lam.

Tơ ring Kơ đông linh Hồ Le vei lăng đei 8 pơ lei kơ 2 xăh Ia Đal păng Ia Tơi (apŭng Ia H’Drai, dêh char Kon Tum) hăm 717 unh hnam, 2.245 ‘nu bơ ngai, mă lơ ‘nŏh công nhân tơ̆ dôm mir đak lar găh Anih jang 716 (Binh đoàn 15) păng Công ty jang hơ doi tơ mât jên jang atŏk tơ iung Duy Tân. Lơ̆m 17 sơ năm âu ki, iŏk đơ̆ng năr pơ jing kơ đông truh dang ei, ‘ngoăih kơ bơ̆ jang dăr joang, vei lăng tơ ring sơ lam, kơ đông hơ nơ̆ng jang ‘lơ̆ng tơ drong krao hơ vơn kon pơ lei.

Mă loi, đơ̆ng blŭng sơ năm 2020 truh dang ei, kơ đông hlôi pơ truh linh bơ̆ jang dăr joang, vei lăng, dơ̆ng gak hơ dai hăm tang găn jĭ Covid-19, vei lăng kơ jăp ‘lơ̆ng tơ ring sơ lam. Lơ̆m nŏh pơ gơ̆r vă jê̆ 150 ‘măng dăr joang tơ̆ tơ ring sơ lam, tang găn jĭ Covid-19. Atŭm hăm ‘nŏh, vei kơ jăp dôm tơ drong hơ găt tơ̆ tơ ring sơ lam, tơ tom chă ƀôh, sek tơ lang dôm bơ ngai mât lĕch lơ̆m tĕh đak glăi luơ̆t; pơ gơ̆r chong hơ met ‘ngiĕt ƀât dôm jrăng sơ lam tĕh đak păng trong dăr joang đei 19km; vei kơ jăp 3 grŭp jang tơ̆ tơ ring vang jang hơ doi hăm khul kơ dră pơ gơ̆r tơ ring, tơ tom sek tơ lang dôm tơ drong ưh hơ iă ‘nao đei tơ̆ tơ ring yoa Kơ đông vei lăng.

Kơ đông linh Hồ Le khăm, ƀơk pơ gang ăn kon pơ lei xăh Ia Đal, apŭng Ia H'Drai, dêh char Kon Tum

Lơ̆m tơ drong krao hơ vơn kon pơ lei, Kơ đông roi tơ ƀôh ăn anih jang đảng, khul kơ dră chĕp kơ̆l 2 xăh Ia Đal păng Ia Tơi (apŭng Ia H’Drai) hơ met kơ jăp khul kăn ƀô̆ xăh, pơ lei pơ la; roi tơ ƀôh iŏk pơ tho pơ hrăm ăn 6 ‘nu đoàn viên rơ gei vă tơ mât lơ̆m Đảng; jang hơ doi hăm Dơ nŏ anih vei lăng kon pơ lei xăh Ia Đal, Binh đoàn 15 pơ gơ̆r tơ gŭm ăn Anih mong jên “Năr yoa bơ ngai tơ nuh” dêh char, mong đei vă jê̆ 30 triu hlak jên; năm ngôi, pơ lung 24 ‘nu kăn ƀô̆, linh jĭ jăn, unh hnam đei tơ drong arih xa mơ mat tat đei kơ jă hlŏh 9 triu hlak jên; hơ păh hlŏh 40 tơ pu tơ mam păng hlŏh 600 blăh che gom tang găn jĭ ăn dôm unh hnam đei tơ drong arih xa mơ mat tat, ƀơm ưh ‘lơ̆ng đơ̆ng jĭ Covid-19; hơ păh 4 tơ pu tơ mam ăn hŏk tro tơ̆ Hnam trưng tĕh đak rong hŏk tro kon kông apŭng păng dôm hnam trưng mâm non, hnam trưng jăl 1, jăl 2 xăh Ia Đal ƀlep ƀât năr pơm lêh mât hŏk sơ năm hŏk ‘nao păng pơ tôch sơ năm hŏk, đei kơ jă 6 triu hlak jên; pơ jao jên ăn tơ drong jang “Chông ba ŏh năm hŏk” ăn 3 ‘nu hŏk tro đei kơ jă 22,5 triu hlak jên; tơ gŭm 15 triu hlak jên ăn unh hnam 1 ‘nu mon “Kon rong khul linh vei lăng tơ ring sơ lam”.

‘Ngoăih kơ ‘nŏh, Kơ đông ăn 12 ‘nu kăn ƀô̆, linh vang jang hơ doi hăm khul kơ dră tơ ring păng kon pơ lei tơ̆ tơ ring vang pĭt unh xa 2 ha bri tơ̆ thôn 8, xăh Ia Đal păng pĭt unh xa 3 ha pơ gar ‘long cao su kơ Anih jang 716 găh plei Ia Đer, xăh Ia Đal; jang hơ doi hăm Anih jang 716, Dơ nŏ anih vei lăng kon pơ lei xăh Ia Đal roi tơ ƀôh găh tơ drong oei xa mă rơ gŏh, tang găn jĭ jăn tơ̆ bơ ngai păng kon tơ rong đei 12 ‘măng, hăm vă jê̆ 330 ‘nu bơ ngai vang akŏm; tơ gŭm ăn kon pơ lei pơm hơ met 7 tŏ hnam so, rô̆ ƀum, phĕ plei điêu păng vei rong ‘long chĕh phe; pơ truh hơ drĕch păng pơ tho ki thuơ̆t pơ tăm ‘nhot ăn dôm jĭt unh hnam; tơ lĕch trong rong rơ mo yŏng, tơ gŭm 1 pôm rơ mo yŏng ăn unh hnam tơ nuh, atŭm hăm ‘nŏh tơ gŭm ăn kon pơ lei tơ̆ tơ ring pơm hơ met hơ drong kron, rong kon tơ rong rơ gŏh ‘lơ̆ng, tang găn đei tơ drong jĭ. Kơ đông oei ăn 2 ‘nu kăn ƀô̆, linh ‘nŏh jĭ bơ ngai kon kông pơm ‘nhŏng ŏh tơ mŏm vă tơ gŭm 2 unh hnam tơ nuh jang tŏk klăih đơ̆ng mơ mat tat; pơ jao ăn 16 ‘nu kăn ƀô̆, linh ‘nŏh jĭ đảng viên tơ gŭm ăn 53 unh hnam jang xa.

Bơ̆ jang tơ drong krao hơ vơn “Đĭ đăng kon pơ lei vang vei lăng tơ drong pơm tơm tĕh đak, vei sơ đơ̆ng tơ drong sơ đơ̆ng tơ̆ tơ ring sơ lam tĕh đak lơ̆m chăl ‘nao”, Kơ đông linh Hồ Le (Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam dêh char Kon Tum chă roi tơ băt, krao hơ vơn đei 3 khul grŭp păng 13 unh hnam tơ̆ xăh Ia Đal chih măt vei lăng 13km trong sơ lam, 13 tŏ jrăng sơ lam păng 5 grŭp vei lăng sơ đơ̆ng chih măt iŏk vei lăng tơ drong sơ đơ̆ng lơ̆m tơ pôl. Hăm xăh Ia Tơi, dang ei Kơ đông oei jang hơ doi dăr hơ len, roi tơ ƀôh, krao hơ vơn khul grŭp, rim bơ ngai, unh hnam vang jang lơ̆m khul vei lăng sơ đơ̆ng tơ̆ tơ ring sơ lam.

Thiếu tá Nguyễn Văn Ngọc – Yŏng chĕp kơ̆l Kơ đông linh Hồ Le pơ ma hơ dăh: Hlŏh 17 sơ năm pơ jing păng jang tŏk, hăm tơ drong juăt ‘lơ̆ng hơ iă đơ̆ng “Ƀô đô̆i Ƀok Hô”, kăn ƀô̆, linh tơ̆ Kơ đông Hồ Le đơ̆ng sơ̆ truh dang ei ưh hli mơ mat tat, kŭm hăm kon pơ lei dôm hơ drĕch hơ drung arih xa tơ̆ tơ ring sơ lam ti chĕp kơ jăp phao vei lăng tơ ring sơ lam tĕh đak roi đunh roi pran kơ jăp, ‘yăp kơ tang”.

Dơ̆ng: Tơ blơ̆