VOV4.Bahnar - Ƀlep ƀơ̆t tơ băt 96 sơ năm năr Hla ar chih kơ tơ̆ng ang Kach mang Việt Nam, pơ gê  ‘năr 15/06, Bí thư Trung ương Đảng, kơ dră anih tơ roi tơ băt Trung ương Nguyễn Trọng Nghĩa hlôi năm tơ mang, hmach chơt hơ iă kơ 4 anih jang chih kơ tơ̆ng ang tơm: ‘noh đei Anih rađiô nơ̆r pơ ma Việt Nam, Anih pơ dăh ti vi Việt Nam, ƀăo Nhân dân, Thông tấn xã Việt Nam, hơ dai hăm ‘noh pơ ma hơ dăh kăl kơ hơ nơ̆ng pơ jing hla ar chih kơ tơ̆ng ang kach mang, hơ gei, ‘lơ̆ng păng đei yua. Năm tơ mang, hmach chơt hơ iă kơ Anih rađiô nơ̆r pơ ma Việt Nam, kơ dră Anih tơ roi tơ băt Trung ương Nguyễn Trọng Nghĩa hơ len lăng khei ‘năr âu ki Anih rađiô nơ̆r pơ ma Việt Nam hlôi đei lơ tơ plih ‘nao găh tơ drong jang tơ roi tơ băt, trong bơ̆ jang hơ gei lơ̆m tơ drong jang tơ roi tơ băt, lơ̆m noh đei lăng găh tơ ring sơ lam, đak dơ sĭ, achon đak dơ sĭ. Kơ dră anih tơ roi tơ băt Trung ương Nguyễn Trọng Nghĩa lui ngeh Nơ̆r pơ ma Việt Nam gô ling lang re jơ va hơ tăih păng tơ roi tơ băt trong vă jang kơ jăp trong jang đơ̆ng đảng truh hăm kon pơ lei păng truh hăm rim hơ drĕch hơ drŭng, mă loi ‘noh jĭ tơ ring sơ lam gô lơ hloh dơ̆ng.

Thuem: Tơ blơ̆