VOV4.Bahnar - Pơ gê ‘năr 11/11, Kiơ̆ tơ drong jang hop akŏm, đơ̆ng rŏng pơ tôch tơ drong găh tơ drong jang linh jĭ rơ ka păng tơ pôl tơ̆ ‘Măng hop akŏm mă 2 Kuôk hô̆i hơ nơ̆ng tơ drong tơm apĭnh jet păng tơl nơ̆r apĭnh jet hăm Kơ dră Anih tơm vei lăng găh pơ tho pơ hrăm. Dôm tơ drong mă bơ ngai tang măt Kuôk hô̆i bơ ngơ̆t truh, tơ lĕch nơ̆r apĭnh jet hăm Kơ dră Anih tơm vei lăng găh pơ tho pơ hrăm Nguyễn Kim Sơn akŏm lơ̆m rim tơ drong mă tơ pôl tŏk bŏk bơ ngơ̆t truh dang ei ‘noh jĭ: pơ tho păng hŏk trực tuyến ‘lơ̆ng, chih hơ met hla ar hŏk kiơ̆ hla ar hŏk ‘nao, pơ tho thim, hŏk thim online. Tơ̆l nơ̆r tơ drong ‘nâu, Kơ dră tơm Nguyễn Kim Sơn tơ băt, tơ drong pơ tho păng hŏk trực tuyến đĭ jơ năr nhen hrei ‘nâu tam mă ƀiơ̆h đei kơ na tơ ƀơ̆p lơ mơ mat tat. Kiơ̆ chih jô̆ ưh kơ sĭ 1,5 triệu ‘nu hŏk tro ưh kơ đei tơ mam hŏk pơ hrăm mă tơ pă đei hloh 1,8 triệu ‘nu hŏk tro ưh kơ đei tơ mam kiơ lơ̆m tơ pang ti vă hŏk trực tuyến. Mă đơ̆ng thoi noh ră, dang ei Anih vei lăng găh pơ tho pơ hrăm tŏk bŏk hơ drin vă vei sơ đơ̆ng ‘lơ̆ng pơ tho păng hŏk hơ tŏ băl đơ̆ng rim trong. Kơ dră tơm vei lăng găh pơ tho pơ hrăm Nguyễn Kim Sơn chih iŏk nơ̆r tơ gop đơ̆ng rim bơ ngai tang măt păng pơ kăp gô đei pơ gơ̆r hơ dăh tơ̆ hơ năp kơnh.

Thuem: Tơ blơ̆