VOV4.Bahnar - Ƀlep ƀơ̆t tơ băt 96 sơ năm năr hla ar chih kơ tơ̆ng ang kach mang Việt Nam (21/6), ƀok Nguyễn Thanh Long – Kơ dră Anih tơm vei lăng găh tơ drong jang pơ gang hlôi đei kơ thơ hmach chơt hơ iă kơ rim anih jang chih kơ tơ̆ng ang. GS.TS Nguyễn Thanh Long – Kơ dră Anih tơm vei lăng găh tơ drong jang pơ gang pơ ma hơ dăh: Rim anih jang chih kơ tơ̆ng ang hlôi yak hơ dai hăm Anih tơm vei lăng găh tơ drong jang pơ gang lơ̆m tơ drong jang pơ gơ̆r, vei lăng, tơ ƀôh trong vă jang, tơ gop tơ gŭm tơ pôl hlôh băt păng pơm đei tơ drong lăp đon đơ̆ng tơ pôl hăm anih jang pơ gang.

Lơ̆m kơ thơ, tang măt anih jang pơ gang, Kơ dră tơm Nguyễn Thanh Long gơ̆ih truh đĭ đăng rim anih jang chih kơ tơ̆ng ang lơ̆m teh đak nơ̆r hmach chơt hơ iă ‘lơ̆ng hloh. Mă loi ‘noh jĭ, lơ̆m tơ drong jang tang găn jĭ COVID-19, lơ bơ ngai chih kơ tơ̆ng hlôi iung jang tơ̆ anih đei jĭ, tơ tom đei măt tơ̆ dôm hơ nih tơ tŏ, tơ roi tôm dôm tơ drong hơ drin đơ̆ng Đảng, khŭl kơ dră teh đak păng đĭ đăng tơ pôl vă jơ nei jĭ hơ buh, jang đang tơ drong jang gĭt kăl đơ̆ng bơ ngai jang chih kơ tơ̆ng ang.

Thuem: Tơ blơ̆