VOV4.Bahnar - Kơ dră chĕp kơ̆l Ban bí thư đei hla ar chih athei hơ nơ̆ng hơ tŏk tơ drong jang tang găn jĭ Covid-19. Kiơ̆ kơ ‘nŏh, Kơ dră chĕp kơ̆l Ban Bí thư athei dôm anih jang đảng, khul kơ dră pơ gơ̆r, Mặt trận Tổ quốc păng dôm khul grŭp akŏm jơ hngâm chĕp kơ̆l pơ gơ̆r bơ̆ jang ‘lơ̆ng 6 tơ drong jang tơm, pơ gơ̆r jang kiơ̆ dôm hla ar pơ tho đơ̆ng Ƀan Bí thư, Thủ tướng tĕh đak, Anih pơ gơ̆r jang kơ tĕh đak găh tang găn jĭ Covid-19 păng nơ̆r pơ tho đơ̆ng Anih tơm vei lăng jang pơ gang; ưh gơ̆h lăng pơ hơi, ưh đei đon kơ chăng lơ̆m tơ drong tang găn jĭ, mă loi ‘nŏh lơ̆m dôm năr pơ dơ̆h lêh 30/4, 01/5 kŭm nhen hơ met ăn pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021 - 2026;

Hơ tŏk tơ drong dăr joang, vei lăng kơ jăp trong sơ lam, ‘măng jang sơ lam, tơ nŏk đak dơ sĭ; Bơ̆ jang kiơ̆ tôm trong jang tang găn jĭ kiơ̆ nơ̆r pơ tho đơ̆ng Anih tơm vei lăng jang pơ gang păng jang kiơ̆ trong sek phak hăm dôm anih jang, rim bơ ngai pơm glăi tơ drong tang găn jĭ; pơ tho jang mă ‘lơ̆ng tơ drong ƀet vắc-xin tang găn jĭ Covid-19; atŭm hăm ‘nŏh hơ tŏk tơ drong tơ roi tơ băt, pơ hlôh đon kon pơ lei athei kơ chăng jang kiơ̆ dôm trong jang tang găn jĭ Covid-19.

Dơ̆ng: Tơ blơ̆