VOV4.Bahnar - Pơ gê ‘năr 23/12, Anih tơ roi tơ băt kơ Trung ương pơ gơ̆r Hop akŏm lơ̆m teh đak pơ tôch tơ drong jang tơ roi tơ băt sơ năm 2021 păng tơ lĕch jang tơ drong jang sơ năm 2022. Hop akŏm đei pơ gơ̆r kiơ̆ trong kơ tă hơ dai hăm trực tuyến tơ̆ rim hơ nih pơ dăh tơ vi lơ̆m teh đak. Sơ năm 2021 hăm jơ hngơ̆m đon kơ chăng, hơ drin ‘lơ̆ng, jang kiơ̆ tơ drong pơ gơ̆r đơ̆ng Anih tơm Chĭnh trĭ, Ban Bí thư păng rim kơ dră đảng, đĭ đăng anih jang Tơ roi tơ băt hlôi tơ plih ‘nao trong jang, tơ lĕch jang tôm tong rim tơ drong jang, jang đang ‘lơ̆ng hơ năp jang bơ̆ jang. Đơ̆ng noh, tơ gop gĭt kăl jang kiơ̆ jơ nei rim hơ năp jang chĭnh trĭ đơ̆ng rim kơ dră đảng, khŭl kơ dră, Mặt trận Tổ quốc păng rim anih jang chĭnh trĭ - tơ pôl.

Kơ dră chĕp kơ̆l Ban Bí thư Võ Văn Thưởng pơ ma tơ̆ hop akŏm

Pơ ma tơ̆ hop akŏm, Kơ dră chĕp kơ̆l Ban Bí thư Võ Văn Thưởng athei, tơ̆ hơ năp kơnh anih jang tơ roi tơ băt kăl hơ nơ̆ng tơ plih ‘nao, hơ tŏk tơ drong ‘lơ̆ng, đei yua tơ drong jang tơ roi tơ băt tơ̆ rim tơ ring. Hơ drin vang jang pơ jing đảng pran kơ jăp găh chĭnh trĭ, đon tơ chĕng, jơ hngơ̆m đon ‘lơ̆ng. Ƀok Võ Văn Thưởng athei tŭn pran tơ drong tơ chĕng hơ len hŏk pơ hrăm, vei kơ jăp, tơ roi tơ băt, tơ lĕch jang kiơ̆ Tơ drong tơ chơ̆t Hop akŏm 13 păng rim tơ drong tơ chơ̆t, hơ găt đơ̆ng Đảng.

Thuem: Tơ blơ̆