VOV4.Bahnar - Tơ băt 131 sơ năm Năr rơ neh kơ ƀok Kơ dră Hồ Chí Minh (19/5), pơ gê (18/5), Khŭl tang măt Anih chĕp kơ̆l pơ gơ̆r Trung ương Đảng, Kơ dră teh đak, Kuôk hô̆i, Khŭl kơ dră teh đak, Anih jang Trung ương  Mặt trận tổ quốc Việt Nam hlôi năm dan kơ vang pơ kao, mơ̆t tơ̆ pơ sat hơ pong kơ ƀok Kơ dră Hồ Chí Minh. Kơ vang pơ kao đơ̆ng Khŭl đei chih chư “Ling lang blŏk bơ nê kơ ƀok Kơ dră Hồ Chí Minh pran kơ tang”. Khŭl tang măt hlôi tơ ƀôh jơ hngơ̆m đon băt bơ nê tôch kơ dêh, kŭp yom ƀlŏk hơ dơ̆r kơ kŏng jang tih tên đơ̆ng ƀok Kơ dră Hồ Chí Minh, kơ dră chĕp kơ̆l pran kơ tang, bơ ngai thây ‘mêm kơ eng kơ Đảng păng hơ drĕch hơ drŭng bơ̆n. Sư hlôi plang hơ kâu pơ đĭ chăl arih ăn tơ drong jang iung tơ blăh pơm rơ ngei hơ drĕch hơ drŭng, rơ ngei teh đak, pơ jing teh đak Việt Nam rơ ngei hiôk hian.

Đang kơ ‘noh, Khŭl hlôi năm dan kơ vang pơ kao, soh nhang, ƀlŏk hơ dơ̆r kơ rim linh nŭih mơng lôch dŏng teh đak tơ̆ Hơ nih man soi ƀlŏk hơ dơ̆r kơ rim linh nŭih mơng lôch dŏng teh đak tơ̆ trong Bắc Sơn. Lơ̆m jơ pơ gơ̆r tơ păt, rim kơ dră chĕp kơ̆l ƀlŏk hơ dơ̆r kơ dôm bơ ngai kon gơ̆h hơ gei kơ hơ drĕch hơ drŭng hlôi hŭt hơ kâu, pham lĕch sĕch huŏng, nŭih mơng iung tơ blăh  lôch hơ chăng yua kơ tơ drong jang iung tơ blăh iŏk rơ ngei hơ drĕch hơ drŭng, yua kơ tơ drong rơ ngei hiôk kơ teh đak, yua kơ tơ drong hơ nŭk hơ noa kơ kon pơ lei.

Thuem: Tơ blơ̆