VOV4.Bahnar - Pơ gê 29/7, tơ̆ Anih jang kơ ƀok Kơ dră tĕh đak, Kơ dră tĕh đak Nguyễn Xuân Phúc sơng ƀok Lloyd Austin Kơ dră tơm vei lăng khul linh tĕh đak Mi oei năm hơ pong tơ̆ Việt Nam kiơ̆ nơ̆r krao hơ vơn đơ̆ng Đại tướng Phan Văn Giang, Kơ dră tơm vei lăng khul linh tĕh đak bơ̆n. 

Tang măt ăn tĕh đak păng kon pơ lei Việt Nam, Kơ dră tĕh đak Nguyễn Xuân Phúc bơ nê Mi tơ gŭm tôch lơ vaccine tang găn jĭ COVID-19 ăn Việt Nam; tơ chĕng ‘lơ̆ng tơ drong pơ ma đam đơ̆ng Kơ dră tơm Lloyd Austin păng Kơ dră tơm vei lăng khul linh Việt Nam Phan Văn Giang; 2 păh drơ̆ng nơ̆r ăn lơ tơ drong jang hơ doi gĭt kăl lơ̆m khei ‘năr truh. Ƀok Kơ dră Lloyd Austin pơ ma hơ dăh Mi vă hơ tŏk hlŏh dơ̆ng tơ drong jang hơ doi hăm Việt Nam hơ met pơ ‘lơ̆ng tơ drong hiong răm đơ̆ng tơ blăh vang sơ̆; kiơ̆ đơ̆ng noh hơ nơ̆ng pơ jing păng hơ met kơ jăp đon lui đơ̆ng 2 tĕh đak.

Sơng Kơ dră tơm vei lăng khul linh tĕh đak Mi Lloyd Austin, Thủ tướng tĕh đak hôn bơ nê ‘măng năm hơ pong tơ̆ Việt Nam đơ̆ng Kơ dră tơm vei lăng khul linh Mi, hơ pơi ‘mĕh pơm hơ tŏk hlŏh dơ̆ng tơ drong pơ vei, jang hơ doi gĭt kăl tôm tơ drong hăm Mi kiơ̆ trong 2 păh đei yoa ngăl, yoa tơ drong rơ ngei, sơ đơ̆ng păng atŏk tơ iung lơ̆m tơ ring păng lơ̆m apŭng plenh tĕh. Thủ tướng pơ ma hơ dăh tơ drong jang hơ doi găh mŭk drăm đơ̆ng 2 tĕh đak oei đei lơ tơ drong ‘lơ̆ng vă jang tŏk, athei 2 păh jang hơ doi mă kơ jăp hlŏh dơ̆ng tơ̆ hơ năp kơnh, mă loi tưk tơ iung dôm tơ drong jang mă Mi jang pran păng Việt Nam đei tôm tơ drong ‘lơ̆ng găh trong nơ năm, anih jang, khul bơ ngai jang, jang unh hơ yuh rơ gŏh.

Dơ̆ng: Tơ blơ̆