VOV4.Bahnar - Pơ gê 23/3, tơ̆ Hnam hôp tĕh đak Mỹ Đình Hà Nội, Khul kơ dră chĕp kơ̆l Trung ương Đoàn pơm lêh tih tơ băt 90 sơ năm Năr pơ jing Đoàn Thanh niên Cộng sản Hồ Chí Minh (26/3/1931-26/3/2021) păng sơng iŏk Mê đai Hồ Chí Minh. Tổng Bí thư, Kơ dră tĕh đak Nguyễn Phú Trọng truh akŏm păng iung pơ ma lơ̆m jơ pơm lêh.

Tổng Bí thư, Kơ dră tĕh đak Nguyễn Phú Trọng; Thủ tướng Nguyễn Xuân Phúc păng lơ kơ dră chĕp kơ̆l dang ei, adrol sơ̆ kơ Đảng, tĕh đak vang pơm lêh tơ băt

Năng dơ̆ng jăl trong 90 sơ năm pơ jing păng jang tŏk lơ̆m tơ drong jang kăch mang tôch ‘lơ̆ng hơ iă đơ̆ng Đảng, đơ̆ng hơ drĕch hơ drung, Đoàn thanh niên cộng sản Hồ Chí Minh păng sơ năm mơ lôh Việt Nam hlôi tơ ƀôh hơ dăh jơ hngâm ‘mêm kơ tĕh đak tôch pơ neh, mĭnh jơ hngâm đon păng lui kiơ̆ tơ drong chĕp kơ̆l pơ gơ̆r đơ̆ng Đảng, hăm đon tơ chĕng ‘lơ̆ng hơ iă găh hơ drĕch hơ drung rơ ngei hiôk hian păng chủ nghĩa xã hội.

Đoàn thanh niên cộng sản Hồ Chí Minh ling lang tơ găl hăm khul jang pơ tăl tôch sơ đơ̆ng kơ Đảng, hnam trưng xã hội chủ nghĩa, jĭ anĭh jang chinh trĭ tơm kơ druh dăm Việt Nam. Pơ ma lơ̆m jơ pơm lêh, Tổng Bí thư, Kơ dră tĕh đak Nguyễn Phú Trọng akhan, athei jăh tơ lĕch trong hŏk pơ hrăm, bơ̆ jang kiơ̆, roi tơ băt păng tơ ƀôh hơ dăh tơ drong Tơ chơ̆t đơ̆ng hop akŏm mă XIII kơ Đảng jing dôm trong jang tih kơ Đoàn, năng ‘nâu jĭ trong jang ưh gơ̆h tơ plih vă tơ lĕch tơ drong jang Đoàn păng tơ drong jang kơ druh dăm, hơ iŏh iĕ.

Dơ̆ng: Tơ blơ̆