VOV4.Bahnar - Tơ băt 73 sơ năm Năr linh j^ rơ ka, linh lôch tang te\h đak (27/7), dêh char Dak Lak pơ jing 4 khul năm ngôi, pơ ma nuh păng hơ păh tơ mam ăn bơ ngai đei ko\ng rơ gei tơ\ tơ ring.

Tơ\ dôm an^h truh ngôi, bơ ngai tang măt ăn dôm khul jet gia, pơ ma nuh găh jơ hngâm pran, tơ drong arih xa kơ đe Me\ Việt Nam nuih mơng, linh j^ rơ ka, j^ jăn ku\m hăm unh hnam đe sư; pơ ma hơ dăh, Đảng păng te\h đak ling lang bơ nê kơ đe linh lôch tang te\h đak, linh j^ rơ ka, j^ jăn păng unh hnam đe sư đei lơ tơ drong tơ gop tih ăn tơ drong tơ blăh io\k rơ ngei hơ dre\ch hơ drung, pơ jing đei 1 te\h đak kơ jăp ‘lơ\ng.

Atu\m hăm ‘no\h tơ [ôh đon hơ pơi ‘me\h, Me\ Việt Nam nuih mơng ku\m hăm đe linh j^ rơ ka, j^ jăn păng unh hnam đe sư ling lang che\p vei tơ drong juăt jang kăch mang, pơ lung kơ tum kơ to\ng ‘nho\ng o\h jang kiơ\ ‘lơ\ng trong jang đơ\ng Đảng, khôi luơ\t te\h đak; adrin ho\k pơ hrăm, bơ\ jang, yak hơ drol lơ\m rim tơ drong vang tơ gop ăn tơ drong tơ iung pơ jing dêh char Dak Lak roi đunh roi rơ gei, pơ dro\ng ‘lơ\ng ro\.

Dơ\ng: Tơ blơ\