VOV4.Bahnar - Apŭng Đăk Tô măh athei rim khŭl jang chĭnh trĭ, khŭl grŭp mơ̆t jang lơ̆m tơ drong jang tơ roi tơ băt, krao hơ vơn kon pơ lei tang găn jĭ. ‘Nâu ji nơ̆r athei đơ̆ng Phŏ kơ dră Anih vei lăng kon pơ lei dêh char Kon Tum Y Ngọc đơ̆ng rŏng năm hơ len lăng tơ drong jang tang găn jĭ hơ buh tơ̆ bơ ngai tơ̆ apŭng Đăk Tô jĭ tơ ring đei bơ ngai jĭ pơ lŏ lĕch đe lơ hloh dêh char hăm 22 ‘nu lơ̆m akŏp kơ sô̆ 33 ‘nu đei jĭ lơ̆m dêh char đơ̆ng blŭng sơ năm truh dang ei. Kơ dră chĕp kơ̆l Anih vei lăng kon pơ lei apŭng Đăk Tô tơ băt dơ̆ng, ‘ngoăih kơ 22 ‘nu jĭ pơ lŏ lĕch đe, tơ ring âu hlôi đei 69 ‘nu jĭ chŭ. Dang ei, apŭng Đăk Tô hlôi păng tŏk bŏk tŭn pran tơ lĕch jang rim tơ drong jang tang găn jĭ hơ buh pơ ma atŭm, jĭ pơ lŏ lĕch đe păng jĭ jơ̆ng ti ƀơ̆r pơ ma hơ drô̆. Hơ drô̆ hăm tơ drong jang tang găn jĭ Covid-19, rim xăh, thị trấn lơ̆m apŭng Đăk Tô hlôi pơ jing rim grŭp bơ̆ jang hơ len lăng, dăr lăng, pơ gơ̆r tơ drong jang tang găn jĭ tơ̆ rim anih tơ tŏ, rim anih đei hơ mơt ƀôh jĭ hơ buh.

Thuem: Tơ blơ̆