VOV4.Bahnar - Kơ sơ̆ ‘năr 13/4, Kơ dră Kuôk hô̆i Vương Đình Huệ, Kơ dră Jơ nŭm vei lăng pôk rơih teh đak kŭm hăm khŭl dăr lăng, hơ len lăng kơ Anih chĕp kơ̆l pơ gơ̆r Kuôk hô̆i, Jơ nŭm vei lăng pôk rơ̆ih teh đak bơ̆ jang hăm Khŭl jang chĕp kơ̆l pơ gơ̆r Anih jang Đảng pơ lei tơm, Anih vei lăng pôk rơ̆ih pơ lei tơm Hải Phòng. Pơ ma tơ̆ jơ bơ̆ jang, Kơ dră Kuôk hô̆i Vương Đình Huệ, Kơ dră Jơ nŭm vei lăng pôk rơ̆ih teh đak akhan, Hải Phòng jĭ anih jang blŭng a năm hơ len lăng, dăr lăng kiơ̆ lơ̆m kơ chư̆k jang ‘nao, yua kơ ‘nâu jĭ 1 lơ̆m dôm tơ ring bơ̆ jang kiơ̆ ‘lơ̆ng tơ drong jang pôk rơ̆ih vă pơ ma dơ nuh, hơ len lăng tơ drong hlôh vao vă đei dôm tơ drong hơ len lăng atŭm lơ̆m teh đak. Kơ dră Kuôk hô̆i Vương Đình Huệ athei, tơ̆ hơ năp âu kơnh, pơ lei tơm Hải Phòng hơ nơ̆ng vei kơ jăp ‘lơ̆ng tơ drong tơm, athei, tơ drong ‘lơ̆ng đơ̆ng ‘măng pôk rơ̆ih ‘măng âu; tơ chĕng hơ len tôm trong jang rơ̆ih bơ ngai jang lơ̆m jơ nŭm rim tơ ring păng klăih song tơ drong jang mă hơ dăh ăn kơ rim bơ ngai đơ̆ng rŏng kơ hơ met tôm bơ ngai. Jơ nŭm vei lăng pôk rơ̆ih kăl kơ đei điên thoăi kăl hơ met ‘lơ̆ng dôm tơ drong ư̆h kơ ê đei ƀôh vă pơ gơ̆r tơ tom tơ drong jang pôk rơ̆ih.

Thuem: Tơ blơ̆