VOV4.Bahnar - Kơ sơ̆ 13/6, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r bơ̆ jang hăm Khul kơ dră chĕp kơ̆l Anih vei lăng dôm tơ drong lơ̆m tơ pôl, 1,2 anih jang kơ Kuô̆k hô̆i găh bơ̆ jang tơ drong tơ gŭm hăm bơ ngai jang hiong tơ drong jang păng dôm bơ ngai pŭ răm đơ̆ng jĭ Covid-19.

Kơ dră Kuô̆k hô̆i Vương Đình Huệ

Đơ̆ng rŏng kơ mơ̆ng nơ̆r pơ ma đơ̆ng dôm bơ ngai jang lơ̆m dôm anih jang kơ Kuô̆k hô̆i, Khul kơ dră tĕh đak, Kơ dră Kuô̆k hô̆i Vương Đình Huệ athei, Khul kơ dră chĕp kơ̆l Anih vei lăng dôm tơ drong lơ̆m tơ pôl hơ nơ̆ng chih răk, tơ lĕch jang kiơ̆ dôm tơ drong tơ chơ̆t đơ̆ng Kuô̆k hô̆i păng Khul kơ dră tĕh đak kiơ̆ đơ̆ng dôm Jơ nŭm pơ gơ̆r kon pơ lei tơ̆ tơ ring; atŭm hăm ‘nŏh athei Khul kơ dră tĕh đak jăh hơ len năng rim tơ drong tơ gŭm ăn bơ ngai ƀơm ưh ‘lơ̆ng đơ̆ng jĭ Covid-19.

Vă tơ gop bơ̆ jang đei yoa ‘lơ̆ng dôm tơ drong tơ gŭm jang atŏk tơ iung mŭk drăm, tơ pôl pơ ma atŭm păng tơ drong tơ gŭm ăn dôm bơ ngai ƀơm ưh ‘lơ̆ng đơ̆ng jĭ Covid-19 pơ ma adrô̆, Kơ dră Kuô̆k hô̆i Vương Đình Huệ athei, Khul kơ dră tĕh đak jăh chih hơ dăh trong jang tŏk, tơ lĕch jên jang mă hrĕnh tơ̆ hơ năp kơnh; hơ nơ̆ng hơ met pơ ‘lơ̆ng anih tơ mât jên jang, tĕch mơ dro, atŏk anih jang kơ dih, mŭk drăm kơ sô̆ păng tơ iung tơ drong jang xa lơ̆m tĕh đak; jăh tơ mât tơ drong tơ chơ̆t đơ̆ng Hop akŏm Đảng mă XIII lơ̆m tơ drong arih xa.

Dơ̆ng: Tơ blơ̆