VOV4.Bahnar - Lăp đơ̆ng rŏng pơ tôch rim ‘măng tơ ƀơ̆p pơ ma dơ nuh hăm bơ ngai tăh hla, kơ sơ̆ ‘năr 11/5, Kơ dră Kuôk hô̆i Vương Đình Huệ hlôi đei jơ bơ̆ jang hăm Khŭl chĕp kơ̆l pơ gơ̆r Anih jang Đảng pơ lei tơm Hải Phòng găh tơ drong jang hơ met ăn pôk rơ̆ih păng pơ tôch jang kiơ̆ tơ drong jang 4 khei blŭng sơ năm. Pơ ma tơ̆ jơ bơ̆ jang, kơ dră Kuôk hô̆i Vương Đình Huệ akhan, pơ lei tơm Hải Phòng hlôi hơ met ăn ‘lơ̆ng ‘măng pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026.

Kơ dră Kuôk hô̆i Vương Đình Huệ bơ̆ jang hăm Khŭl chĕp kơ̆l pơ gơ̆r Anih jang Đảng pơ lei tơm Hải Phòng

Hải Phòng pơ tôch tơ drong jang pơ gơ̆r ăn kơ 15 ‘nu bơ ngai lĕch pơ jei tơ ƀơ̆p pơ ma dơ nuh hăm bơ ngai tăh hla tơ̆ 3 anih jang pôk rơ̆ih vă krao hơ vơn pôk rơ̆ih, trong jang hơ iă, ‘lơ̆ng, tơ păt, hơ gei, jang hơ dai kơ tă păng trực tuyến truh đĭ đăng rim xăh, phường, thị trấn; pơ re nơ̆r kơ tă, kiơ̆ mạng internet. Trong jang âu tôch kơ đei yua, jơ̆p jang trŭh tơ̆ rim tơ ring tơ rang. Kơ dih kâu dôm bơ ngai lĕch pơ jei kŭm ƀôh sơ đơ̆ng jơ hngơ̆m ƀơ̆t dôm tơ drong jang krao hơ vơn, tơ gop nơ̆r đơ̆ng kơ dih đei tơ roi truh bơ ngai tăh hla păng rim răih kon pơ lei. Mă loi ‘noh, pơ lei tơm Hải Phòng jang ‘lơ̆ng tơ drong jang tang găn jĭ Covid-19, dang ei vei lăng ‘lơ̆ng tơ drong, ư̆h kơ lê̆ tơ poh lanh jĭ hơ buh.

Thuem: Tơ blơ̆