VOV4.Bahnar - Hơ nơ̆ng ‘măng năm tơ mang păng bơ̆ jang tơ̆ rim dêh char Tây Nguyên, ‘năr 1/7, Kơ dră Kuôk hô̆i Vương Đình Huệ hlôi bơ̆ jang hăm kơ dră chĕp kơ̆l dêh char Dak Nông. Pơ ma tơ̆ jơ bơ̆ jang, Kơ dră Kuôk hô̆i Vương Đình Huệ lăng ‘lơ̆ng dêh char Dak Nông hlôi pơ gơ̆r kĕh đang ‘măng pôk rơ̆ih bơ ngai tang măt Kuôk hô̆i păng bơ ngai tang măt Jơ nŭm pơ gơ̆r kon pơ lei rim tơ ring; đơ̆ng rŏng hop akŏm Đảng, dêh char hlôi hơ met tôm khŭl kang ƀô̆ rim tơ ring đơ̆ng dêh char, apŭng truh tơ̆ xăh; tơ lĕch jang tơ drong jang bơ̆ jang kiơ̆ tơ drong tơ chơ̆t hop akŏm Đảng lơ̆m teh đak ‘măng mă 13 păng tơ drong tơ chơ̆t hop a kŏm đảng ƀô̆ dêh char ‘măng mă 12 tơ păt.

Kơ dră Kuôk hô̆i bơ̆ jang hăm kơ dră chĕp kơ̆l dêh char Dak Nông

6 khei blŭng sơ năm ‘nâu, tơ drong mŭk drăm, tơ pôl kơ dêh char sơ đơ̆ng ‘lơ̆ng, hơ nơ̆ng đei tŏk 6,03%, ‘nâu jĭ tơ drong hơ drin tôch kơ kăl chih răk, pơ têng hăm jô̆ păh lăp atŭm kơ lơ̆m teh đak; thu mong jên jang đei 58%. Kơ dră kuôk hô̆i Vương Đình Huệ pơ ma hơ dăh, lơ̆m tơ drong vei lăng jĭ hơ buh ‘lơ̆ng, dêh char Dak Nông đei tơ drong hiôk ‘lơ̆ng yak tŏk, hơ tŏk loi dơ̆ng  jang hơ dai tơ ring, tơ klep hơ dai tĕch mơ dro, tŭn pran tơ mơ̆t jên jang teh đak; pơ jing tơ drong jang hơ met ming anih jang choh jang sa, hơ tŏk tơ iung rim tơ mam tơm. 1 lơ̆m dôm tơ drong đei ƀôh tih đơ̆ng Dak Nông lơ̆m khei ‘năr âu ki, ‘noh jĭ tơ drong kon pơ lei năm mơ̆t oei kư̆ kă, Kơ dră Kuôk hô̆i Vương Đình Huệ pơ ma hơ dăh, dêh char kăl kơ pơ jing jing 1 tơ drong tơm, hơ met pơ ‘lơ̆ng tơ̆ pơ đĭ 2 tơ drong năm păng truh.

Kơ dră Kuôk hô̆i bơ̆ jang hăm kơ dră chĕp kơ̆l dêh char Dak Nông

Kŭm lơ̆m ‘năr 1/7 mơ̆n, Kơ dră Kuôk hô̆i Vương Đình Huệ păng khŭl bơ̆ jang hlôi năm tơ mang păng asong tơ mam ăn kang ƀô̆, khŭl linh kŏng an dêh char Dak Nông. Tơ drong jang âu hlôi pơ tôch ‘măng năm bơ̆ jang đơ̆ng kơ dră Kuôk hô̆i Vương Đình Huệ păng khŭl bơ̆ jang tơ̆ rim dêh char Tây Nguyên.

Thuem: Tơ blơ̆