VOV4.Bahnar - Lơ̆m ƀai pơ ma tơ̆ hơ năp Kuôk hô̆i, Ƀlep ƀơ̆t năr Lĭnh jĭ rơ ka, Lĭnh lôch dŏng teh đak 27/7/2021, Kơ dră Kuôk hô̆i Vương Đình Huệ pơ ma hơ dăh, jang kiơ̆ ‘lơ̆ng trong jang tơ gŭm hăm bơ ngai đei kŏng jing tơ drong ‘mêm gĭt kăl, hơ năp jang ‘lơ̆ng rŏ đơ̆ng pơ đĭ khŭl jang chĭnh trĭ păng kon pơ lei hai, jing tơ drong tơm vei sơ đơ̆ng jang kiơ̆ tơ drong jang păng hơ tŏ hơ nơ̆ng tơ pôl, tơ gop hơ met ming grŭp tơ goăt tơ goăl đĭ đăng hơ drĕch hơ drŭng, hơ tŏk đon lui đơ̆ng kon pơ lei lơ̆m Đảng, teh đak hai. Tang măt Kuôk hô̆i, Kơ dră Kuôk hô̆i Vương Đình Huệ gơ̆ih truh rim bơ ngai kră jang kach mang, rim Mĕ Việt Nam nŭih mơng, linh kon pơ lei nŭih mơng, bơ ngai jang nŭih mơng, rim linh jĭ rơ ka, jĭ jăn, ŭnh hnam lĭnh lôch dŏng teh đak, bơ ngai đei kŏng hăm kach mang lơ̆m teh đak nơ̆r apĭnh jet gia rơ hâu, tơ drong ‘mêm tơ pă păng jơ hngơ̆m đon băt bơ nê gĭt kăl. Kơ dră kuôk hô̆i Vương Đình Huệ pơ ma hơ dăh, tơ drong plang hơ kâu tih tên đơ̆ng rim bơ ngai jang kach mang sơ̆, rim lĭnh nŭih mơng lôch dŏng teh đak, lĭnh jĭ rơ ka, ŭnh hnam lĭnh lôch dŏng teh đak, bơ ngai đei kŏng ling lang tưk tơ iung jơ hngơ̆m đon kăp gĭt, hơ tŏk dơ̆ng jơ hngơ̆m pran vă đĭ đăng Đảng, đĭ đăng kon pơ lei păng đĭ đăng linh yak hloh rim mơ mat tat, long nol, pơ jing păng hơ tŏk tơ iung teh đak hiôk hian, hơ nŭk hơ noa.

Thuem: Tơ blơ̆