VOV4.Bahnar - Hơ nơ̆ng năm bơ̆ jang tơ̆ dôm dêh char Tơ ring tĕh tơ măn đak krong Cửu Long, pơ gê 18/3, Kơ dră Kuô̆k hô̆i Nguyễn Thị Kim Ngân, Kơ dră Jơ nŭm vei lăng pôk rơih tĕh đak bơ̆ jang hăm Anĭh pơ gơ̆r tơ drong pôk rơih dêh char An Giang. Truh 5 jơ kơ sơ̆ ‘năr 14/3, Anĭh vei lăng pôk rơih dêh char An Giang sơng iŏk 15 hô sơ bơ ngai lĕch pơ jei pơm bơ ngai tang măt Kuô̆k hô̆i păng 110 hô sơ đơ̆ng bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char.

Dơ nŏ anĭh vei lăng kon pơ lei dôm xăh oei hơ len năng hơ năn bơ ngai tăh hla, dôm bơ ngai tôm 18 sơ năm tŏk tơ̆ kơ pal kiơ̆ tơ ring tăh hla vă chih tơ mât lơ̆m hơ năn bơ ngai tăh hla. Hrei ‘nâu, tơ̆ dêh char An Giang tam đei ƀôh nơ̆r tơ kêng tơ hlâu đơ̆ng kon pơ lei ƀơm truh tơ drong pôk rơih. Tơ drong tơ roi tơ băt găh pôk rơih đei dêh char An Giang bơ̆ jang kiơ̆ lơ trong tôch hơ iă.

Pơ ma nơ̆r pơ tho lơ̆m jơ bơ̆ jang, Kơ dră Kuô̆k hô̆i Nguyễn Thị Kim Ngân akhan, An Giang hlôi jang ‘lơ̆ng tơ drong pơ jing dôm anĭh vei lăng pôk rơih bơ ngai tang măt Jơ nŭm pơ gơ̆r kon pơ lei păng lăp đon hăm 7 tơ drong jang đơ̆ng An Giang tơ lĕch tơ̆ hơ năp kơnh; hơ mĕng An Giang hơ met păng pơ gơ̆r ‘lơ̆ng tơ drong pôk rơih bơ ngai tang măt Kuô̆k hô̆i, bơ ngai tang măt Jơ nŭm pơ gơ̆r kon pơ lei jơ̆p tơ ring.

Dơ̆ng: Tơ blơ̆