VOV4.Bahnar - ‘Năr brei, 13/3, Kơ dră Kuo#k ho#i Nguyễn Thị Kim Ngân đei jơ bơ\ jang hăm kơ dră che\p kơ\l dêh char Điện Biên. Kiơ\ Bí thư đảng dêh char Điện Biên Trần Văn Sơn, Điện Biên j^ dêh char groi kông găh tơ ring Pơ mât Kơ tu kơ te\h đak hăm 130 xăh, phương, th^ trơ\n, ‘no\h đei truh 110 xăh mơ mat tat păng oei tơ\ tơ ring sơ lam te\h đak. Mă đơ\ng thoi no\h ră, sơ năm 2016, ‘măng mă blu\ng, Điện Biên thu mong jên ăn te\h đak đei truh 7.425 ti, to\k hlo\h 10% kơ so# đei pơ jao.

Bí thư đảng dêh char Điện Biên Trần Văn Sơn ‘me\h Kơ dră Kuo#k ho#i tơ re\k, dăr lăng tơ drong tơ le\ch jên jang oei ưh tam mă tôm hlo\h 596 ti vă Điện Biên man pơ ke\h trong, an^h jang kăl tơ\ dôm tơ ring oei xa ‘nao đơ\ng man Hnam kơ măy u\nh điên Sơn La ku\m hăm 1, 2 tơ drong tơ gu\m ăn dêh char jang to\k.

Kơ dră Kuo#k ho#i Nguyễn Thị Kim Ngân akhan, hrei ‘nâu Điện Biên đei kơ so# u\nh hnam tơ nuh lơ hlo\h lơ\m te\h đak, mă lei Điện Biên ku\m đei lơ tơ drong ‘lơ\ng găh chă tơ mang lăng. Điện Biên gơ\h tơ nuh găh mu\k drăm, mă lei ưh đei tơ nuh găh tơ drong jo\h ayo\ kơ do\ xoang, yoa thoi no\h, Kơ dră Kuo#k ho#i pơ tho ăn kơ dră che\p kơ\l dêh char ‘nâu athei bơ\ jang lơ trong chă tơ mang lăng, pơ jing tơ ring tơ rang ‘nao hơ dai hăm sut pơ đ^ pơ ngot, tơ jur tơ nuh hin; tơ mât jên ăn kon pơ lei kon kông ato\k tơ iung cho\h jang xa, vei kơ jăp tơ drong sơ đơ\ng chinh tr^, vei sơ đơ\ng tơ ring sơ lam.  

Dơ\ng: Tơ blơ\