VOV4.Bahnar - Pơ gê brei (10/6), tơ̆ Hnam Kuô̆k hô̆i, pơ gơ̆r hop akŏm mă 7 kơ Anih vei lăng pôk rơih tĕh đak. Kơ dră Kuô̆k hô̆i, Kơ dră Anih vei lăng pôk rơih tĕh đak Vương Đình Huệ pơ gơ̆r hop akŏm. Pơ ma lơ̆m hop akŏm, Kơ dră Kuô̆k hô̆i Vương Đình Huệ ăn tơ băt, đơ̆ng rŏng khei ‘năr hơ met tôch ‘lơ̆ng păng rơ gei, tơ drong pôk rơih Kuô̆k hô̆i păng bơ ngai tang măt Jơ nŭm pơ gơ̆r kon pơ lei jơ̆p tơ ring đei pơ gơ̆r tôch hơ iă, tơ păt ‘lơ̆ng, trŏ khôi luơ̆t, tôch sơ đơ̆ng, gơ̆h ‘mơ ‘met kơ na đei năng hlôi pơ gơ̆r đang ‘lơ̆ng.

Pơ gơ̆r hop akŏm mă 7 Anih vei lăng pôk rơih tĕh đak

Lơ̆m hop akŏm âu, Anih vei lăng pôk rơih tĕh đak tơ gop nơ̆r păng drơ̆ng kiơ̆ Hla ar chih akŏm găh tơ drong pôk rơih bơ ngai tang măt Kuô̆k hô̆i jăl 15; Tơ drong tơ chơ̆t roi tơ băt hơ năn dôm bơ ngai đei pôk pơm bơ ngai tang măt Kuô̆k hô̆i jăl 15. Găh trong jang, jơ năr, khul grŭp, tơ drong vă jang lơ̆m Hop akŏm jơ̆p tĕh đak pơ tôch tơ drong pôk rơih bơ ngai tang măt Kuô̆k hô̆i jăl 15, bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2016, Kơ dră Kuô̆k hô̆i Vương Đình Huệ athei pơ gơ̆r tơ păt păng pơih kiơ̆ trong trư̆k tuyê̆n truh tơ̆ 63 dêh char, plt. Hop akŏm vă pơ gơ̆r lơ̆m ‘năr 15/7/2021.

Dơ̆ng: Tơ blơ̆