VOV4.Bahnar - Pơ gê ‘năr 19/10, tơ̆ Hnam Kuôk hô̆i, Kơ dră Kuôk hô̆i Vương Đình Huệ pơ gơ̆r ‘măng hop akŏm mă 2 Anih pơ gơ̆r chih tơ lĕch tơ drong jang pơ jing păng hơ met pơ ‘lơ̆ng teh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam truh sơ năm 2030 trong vă jang truh sơ năm 2045. Tơ̆ ‘măng hop akŏm âu, Anih pơ gơ̆r jang set hơ len pơ drơ̆ng kiơ̆ hla ar chih tơ roi tơ băt tơ drong jang kơ sô̆ 10 hơ met pơ ‘lơ̆ng trong jang klăih song, jang hơ dai păng vei lăng đơ̆ng rim anih jang teh đak lơ̆m tơ drong bơ̆ jang kiơ̆ tơ drong jang tư pháp đơ̆ng rim anih jang, khŭl jang lơ̆m bơ̆ jang tư pháp pơm lăp hăm ‘meh vă pơ jing, hơ met pơ ‘lơ̆ng teh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam. 

Pơ ma pơ tôch tơ̆ ‘măng hop akŏm, Kơ dră Kuôk hô̆i Vương Đình Huệ athei, 4 hla ar tơ roi tơ băt tơ drong jang đei pơ ma dơ nuh adoi đei 1,2 tơ drong kăl atŭm, ‘noh jĭ teh đak chĕp kơ̆l pơ gơ̆r kiơ̆ khôi luơ̆t ‘noh jĭ kơ jă kăp gĭt atŭm kơ kon bơ ngai. Tơ drong jang teh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam đei tơ drong tơ roi tơ băt tôm đơ̆ng kon pơ lei hai, đei tơ drong hơ drô̆, trong vă jang xã hội chủ nghĩa. Khŭl jang teh đak kŭm đei tơ drong pha găh tơ drong kăl akŏm kon pơ lei pơm tơm, tơ drong kăl chĕp kơ̆l pơ gơ̆r teh đak, drơ̆ng 1 nơ̆r tơ drong klăih song, jang hơ dai vei lăng đơ̆ng jang pơm kiơ̆ tơ drong jang. Yua thoi noh, rim tơ drong jang kăl kơ vei kơ jăp, pơm kiơ̆, vei sơ đơ̆ng tơ ƀôh hơ dăh dôm tơ drong kăl âu.

Thuem: Tơ blơ̆