VOV4.Bahnar - Tơ̆ Hnam Kuô̆k hô̆i, Grŭp jang kơ sô̆ 1, Anih pơ gơ̆r jang “Pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam truh sơ năm 2030, trong jang truh sơ năm 2045” pơ gơ̆r pơ ma đam hăm bơ ngai juăt jang găh 1,2 tơ drong pơ yoa ăn tơ drong hơ met pơ ‘lơ̆ng luơ̆t păng pơ gơ̆r jang kiơ̆ luơ̆t truh sơ năm 2030, trong jang truh sơ năm 2045.

Kơ dră Kuô̆k hô̆i Vương Đình Huệ pơ gơ̆r jơ pơ ma đam. Pơ ma tơ̆ âu, Kơ dră Kuô̆k hô̆i Vương Đình Huệ akhan, ‘nâu jĭ tơ drong tôch mơ mat, đei lơ nơ̆r tơ blang, tơ chĕng hơ len, kơ na tơ drong pơ ma nuh âu tôch gĭt kăl. Yoa thoi nŏh, Kơ dră Kuô̆k hô̆i hơ pơi ‘mĕh dôm bơ ngai juăt jang tơ gop nơ̆r ăn 3 tơ drong tơm nhen: trong chih tơ băt nơ̆r hơ găt hăm tơ drong pơ jing, hơ met pơ ‘lơ̆ng luơ̆t, hơ met pơ ‘lơ̆ng rim khôi luơ̆t păng pơ gơ̆r jang kiơ̆ luơ̆t; tơ drong pơ hnŏng, trong vă jang, trong chih pơ jing luơ̆t păng pơ gơ̆r jang kiơ̆ luơ̆t truh sơ năm 2030, trong vă jang truh sơ năm 2045 pơm lăp hăm tơ drong pơ jing, hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t XHCN Việt Nam.

Dơ̆ng: Tơ blơ̆