VOV4.Bahnar - Pơ gê (31/8), tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r hop akŏm mă 1 Khul chih tơ lĕch tơ drong jang găh “Trong pơ jing, hơ met pơ ‘lơ̆ng khôi luơ̆t păng pơ gơ̆r jang kiơ̆ luơ̆t truh sơ năm 2030, trong jang truh sơ năm 2045 pơm lăp hăm tơ drong ‘mĕh vă pơ jing, hơ met pơ ‘lơ̆ng tĕh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam”, (krao kơ đeh ‘nŏh Khul jang kơ sô̆ 1).

Kơ dră Kuô̆k hô̆i Vương Đình Huệ pơ gơ̆r hop akŏm Khul jang 1

Lơ̆m hop akŏm dôm bơ ngai jang lơ̆m Khul jang 1 tơ gop nơ̆r găh dôm tơ drong mă Kơ dră Kuô̆k hô̆i Vương Đình Huệ pơ ma tơ ƀôh, ‘nŏh jĭ tơ drong tơ chĕng hơ len, trong bơ̆ jang kăl đei pơ gơ̆r lơ ‘măng pơ ma nuh, akŏm đon rơ gei đơ̆ng lơ khul grŭp, lơ bơ ngai rơ gei, athei iŏk yoa ‘lơ̆ng dôm tơ drong kăl đei chih răk đơ̆ng dôm tĕh đak, tơ gĕch iŏk tơ drong jơ nei đơ̆ng tơ drong jang kơ măy 4.0.

Tơ gop nơ̆r lơ̆m hop akŏm, Kơ dră Kuô̆k hô̆i Vương Đình Huệ athei, Khul chih iŏk đĭ nơ̆r pơ ma đơ̆ng dôm bơ ngai jang lơ̆m Khul jang kơ sô̆ 1; tơ gĕch iŏk dôm tơ drong jơ nei, chĕp vei dôm tơ drong ‘lơ̆ng đơ̆ng adrol ki, chă hơ len năng dôm tơ drong gĭt kăl đei chih răk lơ̆m apŭng plenh tĕh; kiơ̆ đơ̆ng noh tưk tơ iung dôm tơ drong kăl păng chih tơ lĕch dôm tơ dỏng ‘nao mă lăp, đei lơ bơ ngai drơ̆ng nơ̆r tơ gŭm.

Dơ̆ng: Tơ blơ̆