VOV4.Bahnar - Ƀlep ƀơ̆t tơ băt Năr bơ ngai jang mơ dro sa Việt Nam 13/10, kơ sơ̆ ‘năr 7/10, tơ̆ Hà Nội, Kơ dră Kuôk hô̆i Vương Đình Huệ tơ mang tơ̆ VCCI păng tơ ƀơ̆p bơ ngai tang măt khŭl jang mơ dro sa Việt Nam ƀlep ƀơ̆t năr Bơ ngai jang mơ dro sa Việt Nam. Pơ ma tơ̆ jơ tơ ƀơ̆p, Kơ dră Kuôk hô̆i Vương Đình Huệ pơ ma hơ dăh, rim trong jang tơ gŭm kơ teh đak đơ̆ng kuôk hô̆i, jô̆ hloi tơ drong jang pơ jing khôi luơ̆t, dăr hơ len păng tơ chơ̆t dôm tơ drong gĭt kăl teh đak adoi athei ‘măn ăn kon pơ lei păng anih jang mơ dro sa lơ̆m hơ nih tơm. Tang măt rim anih jang mơ dro sa, Khŭl jang hơ len lăng ‘lơ̆ng Kuôk hô̆i, Anih chĕp kơ̆l pơ gơ̆r Kuôk hô̆i hlôi tôch kơ tơ tom, tơ tĕnh tơ lĕch tơ drong tơ chơ̆t găh tơ gŭm bơ ngai jang păng bơ ngai yua bơ ngai jang đơ̆ng Jên mong ƀao hiêm ưh kơ đei tơ drong jang tŏk truh 38 rơ bâu ti hlak jên. Hơ dai hăm apĭnh lơ tơ drong tơm, lơ̆m noh ‘mĕh vă Kuôk hô̆i hơ len lăng tơ drong jang tôm tơ drong tơ chơ̆t vă vei sơ đơ̆ng đei ƀlep hăm tơ drong đơ̆ng luơ̆t păng tơ mơ̆t yua đei hloi; tơ lĕch hrôih dôm trong jang tơ gŭm hơ dăh rim anih jang mơ dro sa tŏk bŏk tơ ƀơ̆p mơ mat tat, pŭ ƀơm ưh kơ ‘lơ̆ng đơ̆ng jĭ COVID-19 kiơ̆ trong ƀônh gơh jang, tơ pă yan âu, lăp hăm tơ drong đơ̆ng anih jang mơ dro sa, hăm tơ drong jang păng gơh iŏk yua tơ drong jang tơ gŭm đơ̆ng Teh đak.

 Thuem: Tơ blơ̆