VOV4.Bahnar - Ƀlep ƀât truh hop akŏm dôm Kơ dră Kuô̆k hô̆i apŭng plenh tĕh ‘măng mă 5, tơ̆ anih jang kơ Liên Hiệp quốc tơ̆ Viên (Áo), Kơ dră Kuô̆k hô̆i Vương Đình Huệ tơ ƀâp Kơ dră chĕp kơ̆l Anih vei lăng unh hơ yuh nguyên tử apŭng plenh tĕh (IAEA) ƀok Ra-pha-en Ma-ri-a-nô Gờ-Rốt-xi.

Tơ̆ jơ tơ ƀâp, IAEA roi tơ băt vă tơ ƀôh 2 kơ măy set hơ len PCR păng lơ tơ mam pơ gang, đei kơ jă hlŏh 470.000 Euro ăn Việt Nam lơ̆m tơ drong tang găn jĭ. Kơ dră chĕp kơ̆l IAEA hôn bơ nê Việt Nam lĕch pơ jei vă bơ̆ jang lơ̆m Khul kơ dră pơ gơ̆r IAEA jăl jang 2021-2023 păng hơ pơi ‘mĕh Việt Nam hơ nơ̆ng tơ gop ăn IAEA.

Kơ dră Kuô̆k hô̆i Vương Đình Huệ athei, IAEA roi tơ ƀôh tơ drong kăl, tơ gŭm ki thuơ̆t hơ met pơ ‘lơ̆ng khôi luơ̆t vă vei lăng păng iŏk yoa ‘lơ̆ng unh hơ yuh nguyên tử vă jang tŏk mŭk drăm, năm hơ doi hăm vei lăng cham char păng tơ jră hăm tŏ ‘mi kial tơ plih, tơ gŭm ăn Việt Nam kơ măy kơ mŏk, pơ tho pơ hrăm păng hơ tŏk đon hlôh vao vă iŏk yoa kơ măy hat nhân lơ̆m tơ drong jang pơ gang, tang găn jĭ COVID-19.

Dơ̆ng: Tơ blơ̆