VOV4.Bahnar - Drơ̆m kơ sơ̆ ‘năr 4/11, tơ̆ Hnam Kuôk hô̆i, ƀlep ƀơ̆t Năr khôi luơ̆t Việt Nam (9-11-2021), Kơ dră Kuôk hô̆i Vương Đình Huệ tơ ƀơ̆p muh măt bơ ngai tang măt, kang ƀô̆, bơ ngai jang kơ grŭp rim anih jang khôi luơ̆t, tư pháp, tơ chĕng hơ len pơ jing khôi luơ̆t tơ̆ Kuôk hô̆i. Pơ ma tơ̆ jơ tơ ƀơ̆p, Kơ dră Kuôk hô̆i Vương Đình Huệ pơ ma hơ dăh, Năr khôi luơ̆t Việt Nam ‘noh jĭ năr kơ đĭ đăng kon pơ lei, năr athei pơm kiơ̆ khôi luơ̆t păng vei lăng khôi luơ̆t. Hăm bơ ngai jang tơ drong jang pơ jing khôi luơ̆t lơ̆m anih jang pơ jing khôi luơ̆t ‘noh roi đei tơ drong ‘lơ̆ng hloh dơ̆ng. Kơ dră kuôk hô̆i ‘meh vă, dôm bơ ngai bơ̆ jang lơ̆m tơ drong jang pơ jing khôi luơ̆t athei răp mơ̆ng anih jang pơ truh hla ar chih ming khôi luơ̆t, răp mơ̆ng dôm bơ ngai joăt jang, răp mơ̆ng dih băl vă tơ drong jang pơ jing khôi luơ̆t vei sơ đơ̆ng đei hơ dăh, hrơ̆ch 1 ‘măng, đei sơ đơ̆ng, đunh đai; mă loi ‘noh jĭ ưh kơ lê̆ đei ƀôh tơ drong đei iŏk yua grŭp, iŏk yua hơ drô̆ lơ̆m kơ plăh pơ jing khôi luơ̆t, pơm lăp hăm ‘meh vă pơ cheh, hơ tŏk tơ iung teh đak kơ jăp păng ‘meh vă mơ̆t jang hơ dai hăm apŭng plĕnh teh. ‘Nâu jĭ ‘meh vă tôch kơ ‘lơ̆ng mă kon pơ lei păng bơ ngai tăh hla tơ lĕch ăn hăm dôm bơ ngai jang luơ̆t.

Thuem: Tơ blơ̆