VOV4.Bahnar - Kơ sơ̆ ‘năr 15/6, ƀlep ƀơ̆t tơ băt 96 sơ năm năr Hla ar chih kơ tơ̆ng ang kach mang Việt Nam (21/6),  tơ̆ Hnam Kuôk hô̆i, Anih jang Kuôk hô̆i hlôi tơ ƀơ̆p muh măt păng bơ̆ jang hăm bơ ngai tang măt rim anih jang chih kơ tơ̆ng ang. Truh akŏm păng pơ ma tơ̆ jơ tơ ƀơ̆p muh măt, kơ dră Kuôk hô̆i Vương Đình Huệ pơ ma hơ dăh hơ năp jang đơ̆ng hla ar chih kơ tơ̆ng ang lơ̆m tơ drong bơ̆ jang đơ̆ng Kuôk hô̆i ‘noh tôch kơ gĭt kăl. Jĭ anih jang kon pơ lei rơ̆ih, anih jang tang măt tih hloh kơ kon pơ lei lơ̆m teh đak, đĭ đăng tơ roi găh pơ gơ̆r, bơ̆ jang đơ̆ng Kuôk hô̆i ư̆h kơ gơ̆h truh hăm bơ ngai tăh hla păng kon pơ lei lơ̆m teh đak păng kon pơ lei bơ̆n oei tơ̆ teh đak đe tơ dăh ư̆h kơ đei tơ drong tơ gop đơ̆ng rim anih jang chih kơ tơ̆ng ang. Kiơ̆ đơ̆ng chih kơ tơ̆ng ang, bơ ngai tăh hla dăr hơ len đei tơ drong jang đơ̆ng Kuôk hô̆i păng tơ plơ̆ dơ̆ng, dôm tơ drong đơ̆ng Kuôk hô̆i găh pơ jing khôi luơ̆t, dăr hơ len lăng păng tơ chơ̆t rim tơ drong gĭt kăl kơ teh đak kŭm ư̆h kơ gơ̆h yak mơ̆t lơ̆m tơ drong arih sa tơ dăh tơ drong arih sa ư̆h kơ yak mơ̆t lơ̆m rim tơ drong jang đơ̆ng Kuôk hô̆i. Drơ̆ng lăp hăm dôm nơ̆r tơ gop đơ̆ng kơ dră chĕp kơ̆l rim anih jang chih kơ tơ̆ng ang, tơ̆ hơ năp kơnh, Kơ dră Kuôk hô̆i Vương Đình Huệ pơ ma hơ dăh, tơ drong hơ yơ đei yua ăn hơ tŏk tơ iung teh đak, hơ tŏk ‘lơ̆ng tơ drong arih sa ăn kon pơ lei, ƀlep hăm trong jang đơ̆ng Đảng, khôi luơ̆t đơ̆ng teh đak, đei yua ăn kon pơ lei ‘noh hla ar chih kơ tơ̆ng ang kăl akŏm tơ roi tơ băt.

Thuem: Tơ blơ̆