VOV4.Bahnar - Tơ̆ anih tơm Vienna, Cộng hòa Áo, Hop akŏm dôm Kơ dră Kuô̆k hô̆i apŭng plenh tĕh ‘măng mă 5 đei pơ gơ̆r tih hăm tơ drong vang akŏm đơ̆ng hlŏh 100 Khul tang măt ăn dôm tĕh đak jang hơ doi păng dăr lăng đơ̆ng IPU. Khul tang măt ăn Kuô̆k hô̆i Việt Nam yoa Kơ dră Kuô̆k hô̆i Vương Đình Huệ chĕp kơ̆l vang truh hop akŏm.

Đơ̆ng rŏng kơ pơm lêh pơih blŭng hlôi pơ gơ̆r jơ pơ ma nuh hơ dai hăm tơ drong pơ gơ̆r đơ̆ng Kơ dră IPU păng Tổng thư ký IPU. Kơ dră Kuô̆k hô̆i Vương Đình Huệ păng dôm kơ dră chĕp kơ̆l Kuô̆k hô̆i/Nghị viện lơ̆m apŭng plenh tĕh hlôi pơ ma nuh găh tơ drong “Vă gơ̆h jang tŏk kơ jăp ‘lơ̆ng athei akŏm ăn dôm tơ drong kiơ, tơ drong hiôk chơt, phĭ tơ nŏ ăn kon pơ lei, vei lăng cham char dăh mă pơ ‘nhŏ ăn tơ drong jang tŏk mŭk drăm”.

Pơ ma lơ̆m hop akŏm, Kơ dră Kuô̆k hô̆i Vương Đình Huệ roi tơ ƀôh đon tơ chĕng akhan, jang tŏk kơ jăp ‘lơ̆ng athei tơ rĕk truh jơ hngâm pran kon bơ ngai păng vei lăng cham char kăl ƀiơ̆ kơ akŏm jơ hngâm jang tŏk mŭk drăm. Tơ drong ‘nâu lăp hăm Tơ drong tơm vă jang tŏk pran kơ jăp truh sơ năm 2030 đơ̆ng Liên hợp quốc, ‘nŏh kŭm jing tơ drong pơm hơ tŏ ‘lơ̆ng đơ̆ng 3 tơ drong vă jang mŭk drăm, tơ pôl păng cham char.

Dơ̆ng: Tơ blơ̆