VOV4.Bahnar - Kơ sơ̆ ‘năr 15/4, tơ̆ hnam Kuôk hô̆i pơ gơ̆r Hop akŏm kơ Anih chĕp kơ̆l pơ gơ̆r Kuôk hô̆i hăm rim bơ ngai tang măt joăt jang tơ̆ Trung ương. ‘Nâu jĭ hop akŏm mă blŭng kơ Anih chĕp kơ̆l pơ gơ̆r tơ ƀơ̆p bơ ngai tang măt Kuôk hô̆i joăt jang đơ̆ng rŏng kơ hơ met tôm bơ ngai jang. Kơ dră Kuôk hô̆i Vương Đình Huệ pơ gơ̆r hop akŏm. Pơ ma pơ gơ̆r hop akŏm, kơ dră Kuôk hô̆i Vương Đình Huệ tơ roi rơ đăh, tơ̆ hla ar chih tơ drong tơ chơ̆t pơ trŭh tơ̆ hop akŏm mă 11, Kuôk hô̆i jăl 14 găh tơ drong jang jăl jang 2016 – 2021 kơ Kuôk hô̆i, đei 8 tơ drong tơm mă Kuôk hô̆i jăl 15 kăl athei bơ̆ jang kiơ̆, vei sơ đơ̆ng Kuôk hô̆i tơ pă jing anih jang tang măt kơ jung hloh kơ kon pơ lei. Anih chĕp kơ̆l pơ gơ̆r kơ Kuôk hô̆i hơ nơ̆ng răp mơ̆ng dôm nơ̆r tơ gop đơ̆ng rim bơ ngai tang măt Kuôk hô̆i joăt jang, tơ gop nơ̆r ăn tơ drong tơ plih ‘nao, hơ tŏk ‘lơ̆ng hloh dơ̆ng, đei yua tơ drong jang đơ̆ng Kuôk hô̆i. Tơ̆ hơ năp kơnh, Kuôk hô̆i gô pơ jing tơ drong jang vă bơ̆ jang kiơ̆ tơ drong tơ chơ̆t Hop akŏm ‘măng mă 13 kơ Đảng. Lơ̆m noh gô bơ̆ jang kiơ̆ rim tơ drong jang pha ra băl, hăm tơ drong jang hơ dai, vang jang đơ̆ng rim anih jang pơ gơ̆r păng dôm khei ‘năr hơ dăh. Tơ̆ hơ năp âu kơnh, kơ dră chĕp kơ̆l Kuôk hô̆i gô đei năr jang mă hơ dăh hăm Jơ nŭm vei lăng hơ drĕch kon kông, rim anih jang kơ Kuôk hô̆i pơ jing trong vă jang, tơ lĕch tơ drong tơ chơ̆t lăng truh găh pơ jing khŭl jang khôi luơ̆t lơ̆m jăl jang truh.

Thuem: Tơ blơ̆