VOV4.Bahnar - Vă jê̆ 146 ti hlak jên ‘nŏh jĭ kơ sô̆ jên đei tơ gop kiơ̆ đơ̆ng Anih mong jên Tơ pôl vang tơ gŭm, jơ hngâm đon ‘lơ̆ng mưh bơ̆ jang lơ̆m Lêh nhắn tin “Đĭ đăng kon pơ lei tơ gŭm ăn tơ drong tang găn jĭ Covid-19 păng tơ lĕch tơ drong jang “Vắc xin ăn công nhân” ‘nao đei pơ gơ̆r kơ sơ̆ ‘năr 3/6 tơ̆ Tổng Liên đoàn Lao động Việt Nam.

Tơ drong ‘nâu vă krao hơ vơn đĭ đăng kon pơ lei tơ gŭm, tơ gop jên ăn tơ drong jang tang găn jĭ Covid-19, akŏm jơ hngâm tơ pôl vă kon pơ lei, lơ̆m nŏh đei công nhân gơ̆h ƀet vắc-xin hrôih hlŏh. Kơ sô̆ jên tơ gŭm đơ̆ng Tơ drong krao hơ vơn păng tơ drong jang gô đei iŏk yoa ăn tơ dỏng tang găn jĭ Covid-19, lơ̆m nŏh vă pơ ‘nhŏ ăn tơ drong răt vắc-xin ăn dôm bơ ngai kăl đei tơ gŭm, bơ ngai tơ nuh, công nhân, vang tơ gop tang găn ‘lơ̆ng jĭ, vei lăng jơ hngâm pran, tơ drong arih ăn kon pơ lei.

Pơ ma lơ̆m jơ pơm lêh, Kơ dră Kuô̆k hô̆i Vương Đình Huệ athei dôm anih jang đei ƀơm truh bơ̆ jang roi tơ băt mă rơ đăh rơ đong kơ sô̆ jên mong đei, iŏk yoa jên mă trŏ, đei yoa ‘lơ̆ng kiơ̆ khôi luơ̆t vă pơ yoa ‘lơ̆ng hlŏh ăn tơ drong tang găn jĭ Covid-19.

Dơ̆ng: Tơ blơ̆