VOV4.Bahnar - Kơ sơ̆ (22/4), bơ̆ jang hăm Khul kơ dră chĕp kơ̆l Anih vei lăng jên hu kơ Kuô̆k hô̆i, Kơ dră Kuô̆k hô̆i Vương Đình Huệ athei hơ met pơ kĕh trong jang găh luơ̆t vă pơih tơ drong ‘lơ̆ng ăn tơ drong tơ plih ‘nao, hơ tŏk tơ drong đei yoa mưh vei lăng jên hu tĕh đak.

Lơ̆m jơ bơ̆ jang, Kơ dră Kuô̆k hô̆i Vương Đình Huệ athei Anih vei lăng jên hu kơ chăng dăr hơ len rim tơ drong tơ̆ yăn âu adrol kơ hơ len năng rim tơ drong mă anih âu pơ jao jang, ƀơm truh jên hu, ƀơm truh tơ drong jô̆ hơ len.

Tơ̆ hơ năp dang ei ‘nŏh jĭ hla ar hơ len năng jên hu tĕh đak 6 khei blŭng sơ năm; Hla ar chih tơ lĕch jên jang đơ̆ng Trung ương sơ năm 2021 ăn dôm tơ drong jang tơm kơ tĕh đak; Hla ar chih tơ chơ̆t găh trong jang, tơ drong hơ găt păng kơ sô̆ jên tĕh đak vă tơ lĕch lơ̆m sơ năm 2022.

Kơ dră Kuô̆k hô̆i athei Anih vei lăng jen hu pơ gơ̆r ăn dôm khul chă dăr hơ len vă pơ yoa ăn tơ drong hơ len năng dôm tơ drong vă tơ roi ăn Kuô̆k hô̆i lơ̆m hop akŏm mă 1 păng mă 2 kơ Kuô̆k hô̆i jăl 15.

Dơ̆ng: Tơ blơ̆