VOV4.Bahnar - Ƀlet ƀâp yă Marketa Pakarová Adamova đei pôk pơm Kơ dră Hạ viện tĕh đak Cộng hòa Séc, Kơ dră Kuô̆k hô̆i Vương Đình Huệ hlôi pơ truh kơ thơ chơt hơ iă. Lơ̆m kơ thơ, Kơ dră Kuô̆k hô̆i Vương Đình Huệ tơ ƀôh đon hơ iă mưh ƀôh tơ drong pơ vei ‘lơ̆ng đơ̆ng sơ̆ păng tơ drong jang hơ doi lơ tơ drong đơ̆ng Việt Nam – Séc khei ‘năr âu ki hơnơ̆ng tŏk pran ‘lơ̆ng; tơ drong pơ vei, jang hơ doi đơ̆ng dôm anih chih pơ jing luơ̆t kơ 2 tĕh đak đei vei kơ jăp, tŏk pran tơ̆ tĕh đak păng tơ̆ tơ ring hai.

Tơ̆ hơ năp kơnh, Kơ dră Kuô̆k hô̆i Vương Đình Huệ hơ pơi ‘mĕh yă Kơ dră Hạ viện Cộng hòa Séc hơ nơ̆ng jang hơ doi kơ jăp, tưk tơ iung tơ drong pơ vei ‘lơ̆ng hơ iă păng jang hơ doi kơ jăp ‘lơ̆ng đơ̆ng 2 tĕh đak, 2 anih chih pơ jing luơ̆t roi đunh roi ‘lơ̆ng, đei yoa hlŏh dơ̆ng, yoa tơ drong đei yoa atŭm đơ̆ng kon pơ lei 2 tĕh đak, yoa tơ drong rơ ngei, sơ đơ̆ng, hơ nŭk hơ noa tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆