VOV4.Bahnar - ‘Năr brei (6/5), Kơ dră Kuô̆k hô̆i Vương Đình Huệ, Kơ dră Anih vei lăng pôk rơih kơ tĕh đak kŭm hăm khul dăr lăng đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih kơ Kuô̆k hô̆i bơ̆ jang tơ̆ dêh char Tuyên Quang.

Pơ ma lơ̆m jơ bơ̆ jang, Kơ dră Kuô̆k hô̆i Vương Đình Huệ akhan, tơ drong kăl hlŏh ‘nŏh athei pơ gơ̆r đang ‘lơ̆ng tơ drong pôk rơih, tơ ƀôh hơ dăh găh rim tơ drong nhen tơ iung tôch ai tơ drong pơm tơm đơ̆ng kon pơ lei, tơ drong gơ̆h năm pôk rơih đơ̆ng kon pơ lei.

Kơ dră Kuô̆k hô̆i Vương Đình Huệ bơ̆ jang tơ̆ dêh char Tuyên Quang

Kơ dră Kuô̆k hô̆i Vương Đình Huệ athei, dêh char Tuyên Quang hơ nơ̆ng akŏm jơ hngâm vă bơ̆ jang 2 tơ drong jang tơm, tang găn ‘lơ̆ng jĭ COVID-19 kiơ̆ tơ drong tơ chơ̆t đơ̆ng Ban Bí thư, dôm nơ̆r pơ tho đơ̆ng Khul kơ dră tĕh đak, đơ̆ng Thủ tướng, đơ̆ng Anih pơ gơ̆r jang kơ Trung ương găh tang găn jĭ COVID-19 păng ưh đei hiơt tơ drong jang xa, atŏk tơ iung mŭk drăm, tơ pôl, vei lăng sơ đơ̆ng ‘lơ̆ng tĕh đak, vei lăng ‘lơ̆ng tơ drong arih xa tơ pôl, tơ drong sơ đơ̆ng lơ̆m tơ pôl păng hơ met ‘lơ̆ng ăn tơ drong pôk rơih.

Dơ̆ng: Tơ blơ̆