VOV4.Bahnar - Kơ sơ̆ brei (10/6), Kơ dră Kuô̆k hô̆i Vương Đình Huệ truh hơ pong păng bơ̆ jang tơ̆ Hnam hŏk Quân y. Pơ ma lơ̆m jơ bơ̆ jang, Kơ dră Kuô̆k hô̆i Vương Đình Huệ tơ chĕng ‘lơ̆ng tơ drong adrin păng dôm tơ drong jơ nei mă Hnam hŏk Quân y iŏk đei lơ̆m 72 sơ năm pơ jing păng jang tŏk. Mă loi, lơ̆m tơ drong tang găn jĭ Covid-19, Hnam hŏk Quân y kơ chăng vang bơ̆ jang tang găn, hơ met jĭ tôch đei yoa khei ‘năr âu ki.

Kơ dră Kuô̆k hô̆i Vương Đình Huệ năm hơ pong păng bơ̆ jang tơ̆ Hnam hŏk Quân y

Kơ dră Kuô̆k hô̆i Vương Đình Huệ athei Hnam hŏk Quân y akŏm jơ hngâm bơ̆ jang 1,2 tơ drong jang tơm nhen: năng kăl tơ drong pơ tho pơ hrăm bơ ngai jang rơ gei kiơ̆ trong mât jang hơ doi hăm khoa hŏk kơ măy kơ mŏk păng tơ drong pơ tho pơ hrăm rơ gei kơ apŭng plenh tĕh; hơ nơ̆ng hơ tŏk tơ drong vei lăng păng hơ tŏk tơ drong ‘lơ̆ng mưh hơ met jĭ, tơ lĕch đei lơ trong khăm hơ met jĭ, năng bơ ngai jĭ kăl hlŏh; jang hơ doi kơ jăp găh tơ drong hơ met hăm tơ chĕng hơ len khoa hŏk păng pơ tâp pơ hrăm.

Dơ̆ng: Tơ blơ̆