VOV4.Bahnar - Sơng iŏk nơ̆r krao hơ pơi đơ̆ng Kơ dră Kuô̆k hô̆i Đại Hàn Dân Quốc Park Byeong Seug, Kơ dră Kuô̆k hô̆i Vương Đình Huệ păng Khul tang măt ăn Kuô̆k hô̆i hlôi truh tơ̆ cham gre păr Incheon, anih tơm Seoul, pơ tơm năm hơ pong tơ̆ Đại Hàn Dân Quốc đơ̆ng ‘năr 12-15/12. Sơng khul tơ̆ cham gre păr găh Hàn Quốc đei Phŏ Kơ dră Grŭp ngĭ si jang tơ bôl Hàn-Việt, ngĭ si Suh Jung-Sook.

Kơ dră Kuô̆k hô̆i Vương Đình Huệ năm hơ pong tơ̆ Hàn Quốc

Lơ̆m ‘măng năm hơ pong âu, Kơ dră Kuô̆k hô̆i Vương Đình Huệ păng khul tang măt ăn Kuô̆k hô̆i Việt Nam vă pơ ma đam, tơ ƀâp kơ dră chĕp kơ̆l kơ tĕh đak Hàn Quốc; sơng dôm khul grŭp, bơ ngai tang măt Hàn Quốc; vang Hop akŏm khul tĕch mơ dro; pơ ma đam hăm kơ dră chĕp kơ̆l dôm anih tĕch mơ dro tih; sơng dôm anih tĕch mơ dro tih tơ̆ Hàn Quốc; dơ̆ng lăng lêh kĭ pơ kăp jang hơ doi đơ̆ng dôm anih tơm, anih jang kơ pal, tơ ring tơ rang, anih tĕch mơ dro. Mă loi, bơ ngai tang măt ăn Khul kơ dră 2 tĕh đak vă kĭ tơ drong tơ chơ̆t găh Ƀao hiêm tơ pôl 2 pang đơ̆ng 2 tĕh đak.

Dơ̆ng: Tơ blơ̆