VOV4.Bahnar - Kơ sơ̆ 5-9, Kơ dră Kuô̆k hô̆i Vương Đình Huệ păng khul tang măt ăn Quốc hội tĕh đak bơ̆n truh tơ̆ cham gre păr Schwechat, anih tơm Viên, tĕh đak Áo vang Hop akŏm dôm Kơ dră Kuô̆k hô̆i lơ̆m apŭng plenh tĕh, bơ̆ jang hăm Nghị viện châu Âu (EP), tĕh đak Bỉ păng năm hơ pong tơ̆ tĕh đak Phần Lan.

Kơ dră Kuô̆k hô̆i tơ ƀât bơ ngai jang tơ̆ Anih tang măt ăn Việt Nam tơ̆ Áo

Kiơ̆ trong jang, đơ̆ng rŏng kơ truh tơ̆ tĕh đak Áo, Kơ dră Kuô̆k hô̆i Vương Đình Huệ tơ ƀâp, pơ ma nuh hăm kăn ƀô̆, bơ ngai jang tơ̆ anih tang măt ăn Việt Nam tơ̆ Áo; bơ ngai tang măt ăn tơ pôl bơ ngai Việt Nam tơ̆ Áo, Séc, Hungary, Slovakia. ‘Nâu đei năng jĭ 1 ‘măng tơ ƀâp bơ ngai tang măt gĭt kăl đơ̆ng Kơ dră Kuô̆k hô̆i hăm kon pơ lei bơ̆n oei xa tơ̆ tĕh đak đe.

Vang akŏm lơ̆m Hop akŏm đe ƀok Kơ dră lơ̆m apŭng plenh tĕh ‘măng mă 5, tơ̆ dôm jơ hop akŏm, Kơ dră Kuô̆k hô̆i Vương Đình Huệ gô đei ƀai iung pơ ma gĭt kăl lăp hăm rim tơ drong păng trong jang đơ̆ng Việt Nam. Găh nŏh dơ̆ng, dôm bơ ngai jang lơ̆m khul tang măt ăn Kuô̆k hô̆i Việt Nam oei vă akŏm lơ̆m dôm jơ pơ ma nuh ƀơm truh lơ tơ drong nhen: tơ drong vei lăng cham char, tơ plih kơ sô̆, tơ drong hơ tŏ băl kơ plăh drŏ kăn hăm drŏ nglo, pơ jao tơ drong chĕp kơ̆l ăn drŏ kăn păng đe druh dăm, tơ drong khôi luơ̆t apŭng plenh tĕh păng lơ tơ drong gĭt kăl nai lơ̆m plei tĕh.

Tơ̆ ‘ngoăih hop akŏm, Kơ dră Kuô̆k hô̆i Vương Đình Huệ oei đei lơ ‘măng tơ ƀâp 2 pang hăm Kơ dră Kuô̆k hô̆i dôm tĕh đak, đei hloi dôm tĕh đak jang hơ doi đunh đai, tĕh đak jang hơ doi tôm tơ drong păng tĕh đak jang hơ doi đơ̆ng sơ̆ kơ Việt Nam. ‘Nâu jĭ tơ drong ‘lơ̆ng vă pơ truh nơ̆r tơ băt đơ̆ng Việt Nam ăn kơ dră chĕp kơ̆l dôm tĕh đak găh đon hơ pơi đơ̆ng Việt Nam, hơ nơ̆ng pơm hơ tŏk tơ drong pơ vei ‘lơ̆ng hơ iă đơ̆ng sơ̆, kŭm nhen jang hơ doi lơ tơ drong găh mŭk drăm, tĕch mơ dro, tơ mât jên jang, khoa hŏk, pơ tho pơ hrăm, ki thuơ̆t; kŭm nhen hơ tŏk tơ drong pơ vei nghị viện hăm dôm tĕh đak.

Dơ̆ng: Tơ blơ̆