VOV4.Bahnar - Pơ gê ‘năr 4/11, Kơ dră Kuôk hô̆i Vương Đình Huệ hlôi pơ gơ̆r Hop akŏm tơ lĕch jang bơ̆ jang kiơ̆ tơ drong jang dăr hơ len đơ̆ng Kuôk hô̆i păng Anih chĕp kơ̆l pơ gơ̆r Kuôk hô̆i sơ năm 2022. Hop akŏm đei pơ gơ̆r trực tuyến truh 63 hơ nih pơ dăh ti vi tơ̆ rim dêh char, pơ lei tơm lơ̆m teh đak. Pơ ma pơ gơ̆r tơ̆ hop akŏm, Kơ dră Kuôk hô̆i Vương Đình Huệ tơ băt, khei ‘năr âu ki, Anih chĕp kơ̆l pơ gơ̆r Kuôk hô̆i hlôi akŏm jơ hngơ̆m, ‘măn lơ jơ năr, jên, bơ ngai jang ăn tơ drong hơ met ăn tơ drong jang dăr hơ len.

Kơ dră Kuôk hô̆i Vương Đình Huệ pơ gơ̆r Hop akŏm

Lơ̆m sơ năm 2022, Kuôk hô̆i gô pơ gơ̆r 4 ‘măng dăr hơ len tơ drong jang, lơ̆m noh đei 2 ‘măng dăr hơ len gĭt kăl kơ Kuôk hô̆i, tơ drong jang  bơ̆ jang kiơ̆ trong jang tơ gŭm, khôi luơ̆t găh tơ drong jang proh hơ met jô̆ đơ̆ng Luơ̆t proh hơ met đei tơ mơ̆t yua jang kiơ̆, tơ drong bơ̆ jang kiơ̆ trong jang tơ gŭm găh pơm kiơ̆ ‘mơ ‘met, tơ jră brăh brư kơ jăl jang 2016-2021. Lơ̆m pơ đĭ 4 ‘măng dăr hơ len, Anih chĕp kơ̆l pơ gơ̆r Kuôk hô̆i đei trong tơ lĕch jang hơ vơn rim anih jang kơ Kuôk hô̆i, hơ dai hăm pơ jao hơ năp jang ăn kơ 63 khŭl tang măt Kuôk hô̆i rim dêh char, pơ lei tơm găh Trung ương păng 63 Jơ nŭm pơ gơ̆r kon pơ lei rim dêh char, pơ lei tơm găh Trung ương vang jang; hơ vơn akŏm rim anih jang kơ pal, rim bơ ngai jang vang jang.

Thuem: Tơ blơ̆