VOV4.Bahnar - Hơ nơ̆ng bơ̆ jang lơ̆m ‘măng năm hơ pong tơ̆ Ấn Độ, gơ măng 16/12, kiơ̆ jơ tơ̆ tơ ring, tơ̆ anih tơm New Dehli, Kơ dră Kuô̆k hô̆i Vương Đình Huệ hlôi pơ ma đam hăm Kơ dră Hạ viện Ấn Độ Om Birla. Tơ̆ jơ pơ ma đam, Kơ dră Kuô̆k hô̆i Vương Đình Huệ tơ ƀôh đon hơ iă mưh tơ drong pơ vei, jang hơ doi gĭt kăl tôm tơ drong Việt Nam - Ấn Độ hlôi yak hlŏh 5 sơ năm păng oei tŏk pran ‘lơ̆ng lơ̆m rim tơ drong, mă loi găh chinh trĭ, jang tơ bôl, khul linh vei sơ đơ̆ng, tĕch mơ dro, jŏh ayŏ kơ dŏ xoang păng pơ gơ̆r ăn kon pơ lei tơ ƀâp băl;

Athei 2 tĕh đak hơ nơ̆ng jang hơ doi mă kơ jăp, tơ lĕch tơ drong jang đơ̆ng 2021 - 2023 vă hơ nhăk dôm tơ drong đei yoa tơ pă ăn Khul kơ dră păng kon pơ lei 2 tĕh đak. Ƀlep ƀât ‘măng mă âu, Kơ dră Kuô̆k hô̆i Vương Đình Huệ bơ nê tơ drong tơ gŭm kăp gĭt đơ̆ng Ấn Độ ăn Việt Nam lơ̆m tơ drong tang găn jĭ Covid-19; hôn bơ nê dôm anih tĕch mơ dro Ấn Độ hơ tŏk tơ drong tơ mât jên jang tơ̆ Việt Nam găh dôm tơ drong jang mă Ấn Độ jang pran.

Dơ̆ng: Tơ blơ̆