VOV4.Bahnar - Drơ̆ng nơ̆r krao hơ vơn đơ̆ng kơ dră Kuôk hô̆i Phần Lan Anu Vehvilainen, Kơ dră Kuôk hô̆i Vương Đình Huệ păng Khŭl tang măt gĭt kăl Kuôk hô̆i Việt Nam năm tơ mang tơ̆ Cộng hòa Phần Lan đơ̆ng ‘năr 10-11/9. Pơ gê ‘năr 10/9, tơ̆ Anih tơm Helsinki, Kơ dră Kuôk hô̆i Phần Lan Anu Vehvilainen hlôi pơ gơ̆r pơm lêh sơng kơ dră Kuôk hô̆i Vương Đình Huệ. Đơ̆ng rŏng pơm lêh, Kơ dră Kuôk hô̆i Vương Đình Huệ păng kơ dră kuôk hô̆i Phần Lan Anu Vehvilainen păng khŭl tang găng măt gĭt kăl Kuôk hô̆i 2 teh đak pơ gơ̆r pơ ma đam.

Lơ̆m pơ ma đam, 2 păh akhan, tơ drong pơ vei jang hơ dai đơ̆ng Kuôk hô̆i 2 teh đak đei pơ vei ‘lơ̆ng hơ iă ‘moi kiơ̆ pơ ma dơ nuh 1,2 khŭl kơ dră chĕp kơ̆l păng rim anih jang kơ Kuôk hô̆i. Kuôk hô̆i 2 păh kŭm kăl jang hơ dai đei nơ̆r pơ ma păng vang tơ gop gĭt kăl lơ̆m tơ drong pơ vei đơ̆ng EU păng ASEAN kŭm nhen tơ̆ rim trong jang mă 2 teh đak ‘noh jang lơ̆m khŭl, păng lơ̆m dôm tơ drong mă 2 păh đei đon tơ chĕng atŭm nhen hơ năp jang đơ̆ng chủ nghĩa lơ pang vă pơ trŭt tơ drong rơ ngei, tơ drong pơm tơm kơ kon bơ ngai păng hơ tŏk tơ iung kơ jăp.

Thuem: Tơ blơ̆