VOV4.Bahnar - Jang kiơ̆ tơ drong jang pơ ma dơ nuh hăm bơ ngai tăh hla đơ̆ng rŏng ‘măng hop akŏm mă mônh, Kuôk hô̆i jăl 15, pơ gê brei (5/8), Kơ dră kuôk hô̆i Vương Đình Huệ păng Khŭl tang măt Kuôk hô̆i pơ lei tơm Hải Phòng hlôi pơ gơ̆r pơ ma dơ nuh hăm bơ ngai tăh hla kiơ̆ trong trực tuyến truh đĭ đăng rim quận, apŭng, thị trấn tơ̆ pơ lei tơm Hải Phòng hăm hloh 200 hơ nih pơ̆ih ti vi păng 5.000 ‘nu bơ ngai tăh hla vang akŏm. Drơ̆ng lăp păng lăng ‘lơ̆ng tơ roi tơ băt pơ tôch ‘măng hop akŏm, rim bơ ngai tăh hla akhan, ‘măng  hop akŏm mă mônh, Kuôk hô̆i jăl 15 hlôi tơ ƀôh ‘lơ̆ng đon tơ chĕng đơ̆ng Kơ dră Hồ Chí Minh ‘noh jĭ “ tơ drong tơ plih tơ jră hăm tơ drong ư̆h kơ tơ plih”. Kuôk hô̆i hlôi băt hơ dăh tơ drong teh đak, jang tơ năp ƀơ̆t tơ mơ̆t dơ̆ng tơ drong tơ chơ̆t ‘măng hop akŏm mă mônh hăm dôm tơ drong tam mă biơ̆h đei, pơ jao ăn Khŭl kơ dră teh đak, Thủ tướng teh đak dôm tơ drong khôi luơ̆t kăl vă kơ chăng hloh lơ̆m pơ gơ̆r, vei lăng tang găn jĭ Covid-19. Tơl nơ̆r apĭnh đơ̆ng bơ ngai tăh hla găh tơ drong hơ tŏk tơ iung tơ mang lăng păng mŭk drăm đak dơ sĭ Bạch Long Vĩ păng Cát Bà, kơ dră Kuôk hô̆i Vương Đình Huệ akhan, tơ drong ‘nâu đei tơ drong ‘lơ̆ng gĭt kăl truh vei lăng sơ đơ̆ng teh đak, kơ na athei tơ klep hơ tŏk tơ iung mŭk drăm đak dơ sĭ hăm vei lăng cham char bri brăh, kơ jă kăp gĭt cham char bri brăh hui kơ đei.

Thuem: Tơ blơ̆